2013年6月29日 星期六

甘小文。兵器超人

小文老師啲書在下都有儲一些,但係就極少睇,肯定唔係屬於資深fans讀者果仲,純係為儲書而儲,所以冇乜研究同心得可言!
不過無可否認小文是目前港漫中僅餘嘅幾位熱門、有些號召力而又一路斷續出緊作品嘅資深漫畫人之一,故本blog都會本着介紹多啲唔同漫畫嘅宗旨一路介紹番佢一些新舊作品!

兵器超人係小文因應漫畫兵器熱潮而創作嘅搞笑漫畫,2000年出版,共12期完。


2013年6月26日 星期三

漢民。活屍


活屍係漢民先生怪談系列嘅作品之一,83年出版,兩期完嘅故事相對於漢民嘅作品己算是"長篇",亦係好早期以彩色印刷嘅鬼書!
編寫鬼書除了公仔要嚇得人、有氣氛之外,內容編排同講故事能力都好重要,尤其是鬼故,咁先可以感染讀者興趣,否則就算有好好嘅故事橋段而編排混亂、欠缺講故事能力及感染力,套書出來效果就大打折扣!
"活屍"就完全係一套好吸引嘅鬼書示範本!有齊所有以上須要具備嘅元素。
本性善良嘅男主角生意失敗加上失戀,於是跳樓尋死,但在跳下嘅剎那被"魔鬼"所救,從此被它控制,成為無痛無感、不死不滅嘅"活死人"..........
魔鬼控制着男主角做出種種違背心願嘅壞事,在過程中慢慢成為最有財有勢喚雨呼風嘅黑道大佬,但權力令人腐、利慾可薰心,善良嘅男主角最後被培育成兇殘邪惡嘅人,原來這一切只是一塲魔鬼嘅實驗......當魔鬼決定要離開唔再擺佈男主角時,他最終的下場會是怎樣?!

套書唔係恐怖嚇人,但係恐怖嘅係財富權力令人心變質嘅信息,一套發人深省嘅故事!


2013年6月23日 星期日

池上遼一。男大空、男組(海豹叢書)

記得當年日本漫畫在香港還未有正式版權時,"豪生"同"海豹"就係本地日漫最大出版社,佢哋將原裝日漫一拆為二薄裝,以每兩周出版一期,兼且印刷同訂裝質素與日本原版差好遠,不過當時睇日漫沒有其他選擇,"豪生"、"海豹"存在了好多年,果時最期待嘅就係每兩周出版一期嘅"海豹版"男組及男大空,其時"海豹"己正式取得兩套書版權,所以第1個正式中文版係"海豹"而後來嘅"玉皇朝"取得最終版權,日漫在香港就進入精裝新時代!

池上遼一經典舊作除"男組"之外,尚有"男大空",都係講日本黑道江湖仇殺、學校打鬥,而"男大空"更進一步描寫好多關於中國功夫同招式對拆。書內有唔少招式搏擊對打場面,純支體對打拆招,睇到池上先生幾十年前嘅畫功造藝己達到至高境界!
今次就介紹兩套咁經典池上老師作品嘅"海豹版","男大空"全套28期完,"男組"全套46完



2013年6月20日 星期四

安彥良和。機動戰士+畫集

安彥良和1971年加入手塚治虫公司,1979年創作出"阿里安",自此而成為日本漫畫一代宗師!
1979年至1982年蟬聯動畫最高賞動畫製作人第一位。 1983年獲日本動畫大賞作畫賞。
安彥嘅"機動戰士"動畫原作距今都至少33年,而且是科幻機械大作,幾十年前嘅設定、故事架構己經拍成好多電影、電視,機動戰士高達之名,亞洲以至歐美,無人不曉,日本至殿堂大師級,安彥良和當之無愧!
安彥良和咁多年來作品套套花上心血同時間,出品其實真係不算得多,漫畫本該無彊界,追棒本地馬榮成邱福龍司徒劍僑嘅朋友,實在好難理解怎可以錯過安彥嘅作品?因為目前這幾位己屬現今僅餘港漫主流支柱嘅主筆,都係參照過安彥良和作品而成長!
"機動戰士"大約於十年前安彥開始製作漫畫版大長篇,共長達4800多頁漫畫,共100回,全套單行本23期完,作畫須歷時十年(這比遠比港漫薄裝流水作業式要慢得多),應該成為安彥良和收山嘅最後紀念大作,以其65歲嘅年紀還堅持畫完這套書,無嘢可以再講,只有向這位大師致敬!

而這次一併介紹埋安彥嘅三本有關"機動戰士"嘅畫集,分別係1982年、2000年及2009年出版,內裏嘅彩圖、畫稿、機械設定誠為漫畫迷必備嘅參考、欣賞同收藏範本!


安彥良和漫畫作品一覧:

《虹色的托洛斯基》  8期完
《亞里安》   5期完
《安東》 3期完
《大國主》   5期完
《神武》 5期完
《王道之狗》 6期完
《MARAYA》   3期(港版只出過3期)
《韃狚TYPEOON》4期完
《蚤之王》    1期完
《庫德之星》  6期完(海豹版)
《金星戰記》  4期完
《機動戰士鋼彈 THE ORIGIN》   23期完
  一代暴君   1期完




三本"機動戰士"畫集,彩圖、設定多到爆,畫迷必備寶典!

2013年6月16日 星期日

上官小强、甘小文、利志達、李志清、邱福龍、大衛兒、黄偉建、司徒劍僑。壽星仔part 5


壽星仔由301-400集嘅時期,係1986-1988年出版,當年雖然漫畫市場極度蓬勃,但能够去到這期數嘅港漫也就只有龍虎門同李小龍,甚至後來極受歡迎嘅中華英雄、刀劍笑、玉郎漫畫、街頭霸王等等都去唔到這麼長嘅期數,可見"壽星仔"在小強嘅經營下內部非常團結同隱定,
"壽星仔"維持到咁長時間小強應記一功!
這段時期"壽星仔"封面好多都己非小强所畫,內文方面,除了原有"壽星仔"故事,甘小文長駐每期均有幾頁稿,值得一提係小文在這段時期,有幾段鬼故及正經漫畫,這類佢極少有題材,只刋於"壽星仔"之內!除此以外,邱福龍、司徒劍僑、利志達等喺"壽星仔"一書獨家設計嘅海報、月曆,均好值得珍藏,"壽星仔"還不時有其他主筆客串,客串嘅主筆畫稿就有許景琛、黄偉建、邱福龍、清兒李志清、阿富汗、林雨才、大粒墨、好小子、周日明、司徒劍橋、利志達、BEN、大衛兒,主筆之外,"讀者投稿"亦不乏有好多高水準創作,所以一套如此豐富、經典嘅漫畫書絕對係不可多得、難能可貴!



邱福龍400期"壽星仔"海報。

2013年6月13日 星期四

上官小威。紅藝員的一生(短篇集)

這本上官小威嘅精選集內包含咗六、七段短篇故事,應該係由"靚妹"一書內結集而成,屬於幾冷門嘅一本80年代漫畫,講嘅都係舞女、小姐、紅星嘅悲歡離合,
除故事之外,本書特點就係專欄够晒多;例如有小威與你、小威專欄、畫佬生涯、小威幫花絮等等.......賣3蚊本,低睇
本書厚成80多頁,約於1987-88年出版,題材係偏向針對較年長嘅讀者,而唔太適合小朋友閱讀。



2013年6月10日 星期一

冷門二毫子書仔part 4。錢塘江、畫松樓的禽獸漫畫

錢塘江、畫松樓作品,至少也有40-50年歷史,兩人都係當時相當流行嘅漫畫家,作品好多,但係對於今時今日嘅收藏家,都己冇乜邊個能够清楚確定他們出過多少作品了
這次介紹兩位嘅幾本作品,都係佢哋以"禽獸"為主嘅漫畫作品,錢塘江"金錢豹胡胡國"系列,主角外號"金錢豹"除了要同怪獸作戰之外,亦畫有大量獅子、豹、老虎、鱷魚、象、麻鷹、巨蛇等禽獸動物,真係好少見過有港漫畫到咁多動物嘅漫畫書!
畫松樓嘅"小豬救美""狗煲小濟公"更加以豬仔狗仔人像化並成為主角,有別於錢塘江嘅猛獸漫畫,畫松樓嘅動物角色皆偏於弱小同搞笑為主。



2013年6月7日 星期五

漢民。魔樹


橫版漫畫連環圖大概約70年代中後至80年初產物,而基於排版、版權、原稿遺失、銷量、稿質等問題,絕大部份這時期橫版書,己經沒有重新復刻機會,當中這些漢民橫版留存量極少,即使80年代嘅時候,好多讀者己無緣欣賞佢嘅橫版舊作了!
因為80年代中期鬼書甚受歡迎,"怪異集"須求大量故事題材,於是漢民先生想出了"舊稿新畫"嘅構想,就是參照了他自己以前嘅橫版舊故事,選取當中精彩、自己鍾意嘅舊作重新再畫,變成直版嘅怪異集故事,所以有少量漢民橫版故事,得以"重生",橫版同直度版都同出自漢民手筆,故事相同,但裏面嘅公仔造型、背景、編排都有分別,於是舊著與新著,橫版同直版,以如此形式出現,全港只有漢民獨有。

魔樹非鬼書,而係科幻怪異類;植物學家抽取培植樹液注入自己體內,產生異變,最後變成了失去理智嘅殺人魔"樹人",到醒覺嘅一刻,迎接他是悲慘嘅命運同結局.......

漢民喜歡這個故事,於是多年後再按照橫版"魔樹"重新再畫,取名"食人怪魔"刋於"怪異集"57期內。


2013年6月4日 星期二

戇男。情與義

今日是什麼日子,大家都知道,亦不會忘記!
不過曾經因此而創作或產生嘅港漫,可以揾到嘅實在唔係太多,其中戇男就有唔只一套作品有相關連,可以講戇男鄧浩垣先生係一位好有心嘅漫畫人!
本書嘅啓發創作乃源自89嘅一場民主運動,書內嘅人物角色、主角叫"聞渾"、"畢荊"等,唔駛多講大家都知影射緊某些事物,只不過本書背景轉咗古代嘅秦朝,由始皇焚書坑儒、酒池肉林、民不聊生開始講起.......



2013年6月1日 星期六

黄偉建。暴男

相比起黄偉建嘅"靈幻小姐"、"俠骨神鑑",暴男無疑是佢一部無咁出名嘅作品,不過在下認為呢套"暴男"劇情同故事係唔錯,只要係畫功若再好啲、投入嘅資源、助理陣容、實景再做好啲,套書嘅可觀性就會強好多,銷書量亦應不只於此!
因為上述及種種原因,套書最終都係未能為讀者接受,市場决定咗套書前途,只有短短嘅5期就完結!
"暴男"1992年玉郎出版,共分為兩輯,頭1-4期為第一輯,第二輯原訂5-6期完,但最後只能濃縮為一期完,雖然係草草完結,但相比起一些不負責任嘅爛尾作品,己經算非常有良心及道德了!

"暴男"故事係講主角傲青加入咗中國成立嘅一支擁有超能力特殊部隊訓練,最後背叛逃離咗組織而被組織派出超能力殺手追殺,大戰連場。
在第二輯故事即最後一期講到傲青逃亡到一個反政府組織嘅小島村莊內生活,政府軍派出靠吸食特殊藥物增强戰鬥力嘅"八四"部隊到小島進行屠殺清洗,傲青選擇與全島民眾共存亡.....最後,小島村民眾被特殊軍隊全部韱滅,而對方人多勢眾,傲青是絕無生機......
本書雖無提及創作嘅理念同動機,我們無從揣測作者心意,不過從套書嘅內容、故事、人物、地點,加上最後一期出版時序剛好是六月,大家或可領會作者心意?