2013年2月27日 星期三

上官小强的漫畫世界。太空小英傑系列

早期嘅小強漫畫,涉足嘅題材既廣泛又多變,筆名之多、題材之廣,可算是一位最多元化嘅漫畫家代表!
佢筆下嘅漫畫,有搞笑嘅两爺孫、王先生系列、市井打鬥嘅小流氓系列、江湖武俠嘅獨臂刀系列、神仙故事嘅小濟公、孫悟空、小西遊系列、足球運動嘅小球王系列、俠義技擊嘅黄飛鴻、方世玉系列,仲有科幻太空嘅超人、小魔神系列....而今期介紹佢嘅太空科幻題材漫畫其中一個系列:太空小英傑,內容係小英傑打怪獸、打外星人、鐵甲人,出場除了主角太空小英傑之外,尚有超人、金達等,不過就淪為配角....



2013年2月24日 星期日

曹志豪。新年戀愛睇真啲

這本是18年前1994年嘅元宵中國情人節期間所出嘅漫畫,可能係曹志豪最早期出道嘅個人單行本作品,就算喺當年都算係幾冷門嘅書,所以未必有太多讀者會記得或買過這本,不過18年後嘅今天2013年元霄情人節,香港市面己再無這類"賀節"性嘅漫畫出,所以儘管這本當時不是什麽大制作、銷量高嘅流行熱門漫畫,但是在今天這個傳統佳節攞返出黎介紹下,都還算是合適吧!祝各位blog友情人節快樂


2013年2月21日 星期四

李志清。超能力


這本算係清兒相當早期嘅個人單行本,1984年9月出版。
清兒對於畫神鬼怪異類題材甚有心得,早期時亦以畫這類題材大受歡迎,這部初期個人作品"超能力"講述擁有超能力嘅少年童非得到魔法老人幫助啓發潛在超能力與"黑魔"對抗,故事好簡單,但公仔以當年一位新人主筆黎講畫得都相當唔錯。自此經過多年之後,佢嘅作品三國誌打入日本市場、近年幫政府畫道路安全宣傳漫畫、又成為漫畫星光大道嘅其中一位漫畫家......今天我哋睇返佢早期這本"超能力",有否看到一些蛛絲馬跡啓示到佢後期嘅成功呢?






2013年2月18日 星期一

司徒劍僑。超神Z、畫集、年曆

講到港漫科幻漫畫,不得不提司徒劍僑,佢嘅科幻作品喺港漫當中都算係代表者,而佢咁多套作品之中,又該以1993年這套"超神Z"為其代表之作!
這套書無論係質、量、心機、時間、制作、口碑、以至銷量上都係咁成功,係其中一套讀者不容錯過嘅港漫佳作,所以在本BLOG亦不能缺少介紹這套書!
"超神Z"第一輯1-10期完結,但第二輯就不知什麽原因只出得一本,因為這套書幾賣得,所以也出了唔少週邊產品,包括畫集、月曆、POSTER、閃咭等.....
相信好大部份朋友都有KEEP這套書或己睇過,套書內文就唔再多落墨介紹了,就登返多啲本畫集同月曆嘅靚靚彩圖.......

司徒劍僑部份作品目錄:

1984年:萍踪俠影錄1-2期
1984年:戰神1-3期
1984年:幻影迷離1-6期
1986年:貓眼兒(短篇)
1986年:戀愛你好嗎(短篇)
1986年:跳駒(短篇)
1987年:死亡的呼喚(短篇)
1987年:八仙伏妖
1988年:吸血女美夕
1988年:赤煞
1988年:八仙伏妖(妖魔鬼怪)
1988年:破邪(妖魔鬼怪)
1988年:狼童(妖魔鬼怪)
1989年:殺劍1-39期
1990年:賭聖1-158期
1992年:超神序章
1993年:超神Z  1-10期
1996年:超魔危機1-7期


2013年2月14日 星期四

何志文。新天若有情-波動少女

志文這套新天若有情之波動少女,就正好既符合今月科幻主題又符合今日情人節嘅漫畫這套集愛情、動作、科幻、未來於一身嘅漫畫,就至啱志文發揮!只可惜自到90年代,漫畫題材己邁向單一化,香港讀者所培養成嘅漫畫閱讀喜好,根本唔係這類型類漫畫,若非以"强勁"打鬥為主嘅非主流漫畫題材,好難維持長久!
不過這套書無論係以"漫畫"嘅角度或是以志文作品嘅角度,都是一套值得配以"珍藏"而視之,是一套志文fans、港漫讀者不容錯過嘅優良漫畫!
新天若有情,1992年志文自資出版,第一輯故事波動少女,1-23期完結,第二輯24-34期,乃純愛情故事,全套新天若有情共34期。
波動少女,女主角"天若"乃來自2030未來世界,係人類與機械最高科技結晶擁有人類感情嘅人造人,"天若"有由月球所推動嘅能量,可以由普通人變身為"波動少女",她目的是回到90年代,感化將會成為滅世者嘅男主角88男,但是"魔動"一族就主張將88男剷除....



2013年2月9日 星期六

上官小寶。小醉仙-恭喜發財!

上官小寶嘅著作小醉仙,算係小寶唯一輕鬆搞笑諷刺時弊嘅得意作品,同黃玉郎小儍仙打正對台,但係都一樣咁受歡迎!這本因應賀年而出嘅"小醉仙"恭喜發財精選,一期完,可能係最早為賀年而推出嘅輕鬆漫畫,喺2013農曆年前睇返這本70年代過年出嘅漫畫書,亦唔會太覺得脫節!
本書以輕鬆搞笑諷刺時弊,有多個故事組成,分別為:破產記、食貴米、記者生涯、乜都講水$,淨睇返這些標題,大概都知道內容講啲乜啦,呢啲漫畫所描繪嘅,到今時今日時代雖然係進步咗,但其實我們今日所面對嘅生活、民生問題原來都係同40年前冇乜大改變
勾起回憶、反映時弊、見証時代,實在呢啲就係一本好漫畫所存在嘅價值同意義,唔知現在嘅漫畫可唔可以做到咁樣呢?咁唔知呢啲舊漫畫又會勾起大家一些什麽滋味與感受呢?
祝各位新年快樂、心想事成,恭喜發財



2013年2月6日 星期三

峰惠研/高翔。宇宙魔幻錄

宇宙紀元3687年,普米弟星被宇宙黑洞磁場引力干擾而毁滅!超新人類羅莎莉娜逃離己滅亡嘅家鄉普米弟星,展開宇宙歷險之旅.......
峰惠研/高翔作品"宇宙魔幻錄",由龍虎中華圖書於1984年10月出版,1-3期,鏡內維京、心能浩劫、巫術,3期為一完整故事,4-5期,茫區、宇宙聖物、盜目者為三個單元故事,全套6本。
這套書係在下收藏之中比較特別喜愛嘅一套之一,皆因題材同繪畫風格別樹一幟,在港漫之中,無論係之前或之後嘅年代都好少再見到類似嘅作品同畫風,而在80年代初小本經營小規模出版公司及缺少助理嘅情况下,套書有誠意兼做到咁嘅水準,算係相當不錯,只係香港市場太細、當時所接受嘅題材乃以武打同鬼書為主,所以只能去到5、6期。




2013年2月3日 星期日

漢民。巫術、異聲

今個月本BLOG介紹嘅書,主題以超能力、異能、超人、神仙、科幻為主,但唔好以為會係一些較新出版嘅書,相反好多都係舊書,因為最近這十年八年港漫都冇晒以上類別嘅書,這些題材就只有陳年舊書才可以看到。
今次就先介紹漢民兩本涉及奇異特別力量嘅"巫術"及外太空科幻嘅"異聲"......
睇漢民嘅作品,又未必一定係鬼故,以科幻、懸疑、未來、風水、怪異也佔佢作品唔少嘅百份比,而這些故事作品嘅結局又未必係悲劇收場,例如今次介紹這兩本漢民怪談系列巫術、異聲,故事都係有完滿結局!
"巫術"係講兩位擅使巫術異能嘅高手比試功力各顯神通,故事是源自余過嘅小說"四人夜話"
"異聲"內容係講美國太空總署收到來自外太空傳來嘅訊息,每次皆能百份佰準確預言到未來所發生嘅事件,原來訊息乃來自外太空超智能生物.........
這兩本咁精彩懸疑嘅作品,是屬於漢民22本怪談系列其中兩本,係漢民怪談系列較少見嘅兩本,也是在"怪異集"之前嘅漢民著作