2011年9月30日 星期五

上官小威-鬼劇場(上官小威作品集part 1)

其實能夠係8、90年代以個人來說可以畫鬼書畫到幾百期嘅人,除小威外都無第二個,佢真係食正個潮流同用盡佢!但係能將佢啲鬼書視為"珍藏"咁留住而又齊全嘅,真係搵唔到半個人,而我呢套齊少少嘅合訂本可以避過當廢紙回收keep到依家,可以算係奇迹.....
十月哈囉喂鬼書第二擊,就拎呢套小威鬼故"鬼劇場"post上黎!呢套合訂本每本有四個故仔,成120頁厚,即係等於4本簿裝書,你又曾經係報攤見過當中嘅幾多個封面呢?


温馨提示:個別封面可能引起不安,驚鬼膽小者就咪睇下去

2011年9月27日 星期二

謝志榮-沙漠之鷹

有一段時期謝志榮都出過唔少書,佢畫鬼故就最好,畫科幻同武打都OK。其實佢啲公仔真係唔錯,所以當時能够同馬榮成馮志明齊名成為三師兄弟。
喺"漫畫王"連載過嘅"沙漠之鷹",出小型單行本,一期完有成近70頁,十分低睇。
"沙漠之鷹"係講古埃及戰士故事,唔講咁多,貼多幾頁內文先......

出版日期:4-9-1984





2011年9月25日 星期日

橫版書-艷鬼食人花

快踏入"哈囉喂"月,我打算推多的鬼書出來應下節,就由呢本"艷鬼食人花"打頭陣!
以前好多橫度書,就算有幾耐歷史、幾偏門,自己沒有的,都起碼見過下封面或者廣告,不過呢本我未買之前就真係未見過。
呢本橫版鬼書,成本嘢又揾唔到作者名、又無登價錢,咁樣出書都得????所以當時咪吸引咗我買返屋企研究囉




呢本無名無姓無價錢嘅鬼書,根本唔知出自邊個手筆,估計係8角子書,唔講咁多,登多幾頁內文睇下有無邊位高人知道作者係邊個先!






2011年9月22日 星期四

葉明發-武尊少林

三國神兵、水滸戰魂、天下無敵小劍仙、沈虎禪、劍邪神、拳斗、中華英雄外傅、王風雷傅、說英雄誰是英雄、孔雀明王、劍始虎、霹靂狂龍、邊荒傳說、甜蜜十六歲、九紋龍........原來葉明發唔經唔覺都己經出咗咁多個人作品!唔知啱唔啱你口味?不過我就覺得幾有潛力咯!
佢嘅第一二套個人作品係1993嘅"不死狂刀"同"武尊少林",今次就先講佢第二套個人作品"武尊少林"。

"武尊少林"當時標榜漫畫先河、首創電視劇改編成漫畫,呢次同TVB合作,與電視劇同步推出,也是絕無僅有。
一套共7本,size比一般連環圖大少少,每期定價$15-$18,比依家啲書重貴。





2011年9月20日 星期二

漢民-雙影人、無生命的人、透明人



漢民筆下嘅神神鬼鬼故事多如牛毛,佢筆下嘅人、神、鬼角色都係千變萬化耐人尋味、引人入勝嘅!今次執咗幾本分享:雙影人、無生命的人、透明人。
雙影人係講鬼,無生命的人係講機械人,透明人就係講述科學幻想........
三套書之中,橫版嘅"雙影人"最耐歷史,更沒有出過合訂本。"無生命的人"係漢民怪談系列其中一本,比"透明人"同"怪異集"要早期,"無生命的人"之後又出過合訂本,但係原裝係彩色,合訂本就變返黑白,而先彩色後黑白嘅出版方式係比較特別一些,於是亦形成兩個版本!
而一套5本嘅"透明人"就係漢民最長篇嘅作品,這5本亦從未再出合訂本或复刻,所以同"雙影人"都係甚少見嘅漢民作品。

雙影人,雖然無具體資料,但這本極可能係漢民最後一本橫度書




2011年9月17日 星期六

池上遼一 part 1 男組

池上遼一,真係好多香港漫畫人都封佢為偶像,我見過好多好多香港漫畫人作品都跟佢嘅畫風同造型,可以講話係影響香港至深嘅一個外國漫畫家。
我特別仲意佢男大空、男組、青拳狼、舞、星雲兒、淚眼煞星、傷追人,這段時期的作品,係佢顛峰之作!尤其是舞、星雲兒,講超能力講太空科幻,係池上作品中少有嘅題材!
不過第一次寫池上遼一就一定係先寫我最仲意嘅作品"男組",仲意睇漫畫、畫漫畫、甚至係仲意馬榮成嘅,真係無理中唔睇呢套"男組"!



因為好仲意,所以前後集齊三個"男組"版本...

第一套儲齊嘅就係"豪生"版,呢個版本,係舊時日漫港版之中較難揾較難齊嘅經典書之一,雖然在今時今日睇來係印刷好差好殘,但係當時嚟講每一本都好珍惜咁收藏keep到依家!全套26本。




2011年9月14日 星期三

寺澤武一 part1- 哥普拉、哥普拉女郎畫集

寺澤武一嘅"哥普拉",係至今我看過至正、畫得至靚嘅太空科幻故事,書中大量天馬行空未來場景、外星景象、外星人造型,奇幻想像、天馬行空,令人目不暇給,正到無人有!原來這麽科幻嘅未來世界,己經係寺澤武一 1977年嘅創作,"哥普拉"都係必看嘅日漫之一!

"哥普拉"香港都有出中文版,但係我始終覺得最正嘅係原祖日文版一套18本係原汁原味最正,所以咪儲咗一套原裝版本囉!

日文版一套18本,原汁原味零舍有味道




2011年9月11日 星期日

張萬有-戰馬

以張萬有嘅能力同畫功,只得如此少量以個人名義嘅作品,而且大都係得幾期、十幾期貨仔就爛尾,係咪欠運還是什麼原因?真係令人好難理解!
其中包括了即使與"天下"合作嘅呢套"戰馬",由馬仔寫序邱福龍畫海報,雙星拱照都不能逃過爛尾命運。

呢套由"天下"係92年出版嘅"戰馬",唔經唔過都己經係回歸前5年嘅作品咯!

戰馬全套16期





2011年9月8日 星期四

余均偉-神奇小子

余均偉即力卡圖,呢套"神奇小子"該係佢最早作品,1983年出版,全套出咗14期,由第1期黑白印刷至第6期轉為彩色。我都幾仲意余均偉,啲公仔都幾靚,可惜作品太少咯。

1-14期封面,第8期原本係有,但一時唔知"攝"咗係邊,找到再補回





2011年9月5日 星期一

夢妮-猛鬼冤魂

數夢妮比較出名作品,首推"猛鬼冤魂",因為都出到20多期,之後玉郎集團係80年代又再以"猛鬼冤魂"作書名出咗成200多期,係香港經典鬼書之一。
夢妮版嘅"猛鬼冤魂"我都有好幾本,每本都係獨立故事。而這本第一期比較少有就集中登多幾頁出嚟,有時回味睇返以前嘅鬼書又別有一番風味!





2011年9月2日 星期五

上官小強-鬼馬烏龍王

上官小強係香港產量最多,也是繒畫年資最長、經歴最耐嘅香港漫畫家!與他同期的漢民、黃玉郎、上官小寶、小威等,己早不再寫稿,
但小强從2毫子3亳子書時代開始到現今,還有作品每星期在730報紙連載!
佢早期不同筆名發表作品之多,可能係全港第一,作品題材種類,包括了技擊、武俠、搞笑、現代、奇幻、超人怪獸、小流氓、鬼怪、民間傅奇、黃飛鴻.....我相信己超過黃玉郎上官小寶小威同漢民,單單係以前2毫子3亳子裝嘅封面獨立故事,我見過嘅都遠超一百本!
而接近600期嘅"壽星仔"到至今還在報紙730每星期連載,這是一項紀錄!
好多朋友睇開公仔書,都會以黃玉郎馬榮成邱福龍漢民等為首選,無他,因為公仔靚手稿勁,而小强嘅作品,往往會擺係次選、甚至再次選,我以前都係一樣!
但直到現時對我來說,上官小強跟黃玉郎馬榮成邱福龍漢民係我心中份量係無分別,而對於佢以前嘅作品,可以講話係"愛不擇手"!
因為你會發覺佢嘅公仔好得意、好搞笑、好另類,"龍虎門"、"如來神掌"、"中華英雄"你可以揾到好多個主筆,你又可以係市面上揾到好多掛着"黃玉郎作品",但係"壽星仔"就由頭到尾得上官小強揹飛,因為佢獨特風格無人能及!
而香港也只有他唯一一個可以從2毫子裝、3亳子裝、8毫子、橫版書、直度書....一路過渡直到今時今日仲有作品係報紙發表嘅漫畫家!係名符其實嘅"畫壇壽星仔"!
佢嘅"壽星仔"將會好似"多啦A夢"藤子不二雄般,成為香港漫畫一個經典!


講返下面這本8毫子小强作品"鬼馬烏龍王",SIZE同左邊本77年出版嘅"壽星仔"一樣,但"鬼馬烏龍王"嘅出版日期比"壽星仔"還要早好多,當時本書係每頁6格嘅連續故事。