2012年4月28日 星期六

何志文。機密檔案林過雲

這本自由人出版嘅電影精裝漫畫"林過雲",家傳户曉,絕對有賣點!全書劇情依足原著電影,書中刋載大量劇照,林過雲背景、心態、前因後果、資料、從犯案到被捕案情落到齊。
不過與其說是偵探奇案漫畫,不如說是一本恐怖驚慄漫畫!但感覺又比讀看恐怖漫畫更恐怖,應該係志文最血腥暴淚嘅作品!



2012年4月25日 星期三

何志文。天若有情之天長地久

8、90年代,電影天若有情系列大賣,由杜棋峯監製、陳木勝導演,由郭天王、吳倩蓮、郭晉安、黃秋生主演嘅天若有情2之天長地久,相信好多當年代嘅朋友都會對這系列電影有深刻印像....
天若有情之天長地久漫畫版則由志文製作編繪,呢啲江湖浪漫愛情故事就最適合志文發揮!這套書乃精裝版黑白印製分上下兩集,以志文功力加埋編著劇情嘅精彩度,此套兩本漫畫係不容錯過嘅收藏作品!



2012年4月21日 星期六

志文、栢迪、大衛兒、司徒劍僑、利志達、謝志榮。猛鬼聊齋


這套比"英雄劍"更早嘅志文鬼書"猛鬼聊齋",全套12本,1988年出版,以志文嘅鬼故做主打,每期配以其他嘉賓主筆,栢迪、大衛兒、司徒劍僑、利志達、謝志榮、米奇等等,可謂全部都係當時得令嘅主筆,所以這12本"猛鬼聊齋",本本都係好嘢
因為這套書收錄咗好多主筆昔年嘅作品,而且唔係太多人睇過,所以唔講咁多,我將全部嘅主筆作品、版頭、書名等,全部集齊記錄.......

十二期全封面:


2012年4月18日 星期三

志文武俠作品。英雄劍、雪山飛狐、書劍恩仇錄

志文嘅武俠作品除英雄劍、雪山飛狐、書劍恩仇錄之外,就只還有殺手傳奇、絕代雙驕、絕世無雙這幾套。
今次就回味下志文嘅武俠作品,英雄劍係89年由天下出版,雙週刋,故事構思大綱係以一把"英雄劍"為故事主軸,不同時期獲得此劍嘅持劍者就自動成為故事主角,好似第一個獲得此劍嘅獨孤兒就成為第一輯嘅故事主角,直至獨孤兒戰死,第二個得到英雄劍嘅就成為第二輯故事主角,餘此類推,構思係唔錯,但好可惜套書只出到第二輯便爛尾
相隔十年後1998年志文又出咗两本"雪山飛狐"嘅序章篇,之後"雪山飛狐"嘅正篇就再未有下文......而2005年出嘅"書劍恩仇錄"全套只得30期,係志文最後期嘅兩套作品之一,另一套就係絕世無雙2


英雄劍"獨孤兒
"全書十期完,第二輯"爭霸"由第11期開始出到16期未完爛尾



2012年4月15日 星期日

何志文。龍鷹傳奇之爾國臨格

黄易小說改編成漫畫嘅,真係有唔少,今次志文就選咗將佢套"龍鷹傳奇之爾國臨格"改篇為精裝漫畫版!
這套以黑白印制、月刋形式出版嘅漫畫,雖然志文都落足心機畫,又做足故事背景圖片資料搜集,但都係僅出到兩期故事便爛尾,証明呢類非武俠武打題材都係唔掂!港漫讀者單一化、狹窄題材嘅閱讀文化,亦都係令到港漫無法健康持續發展嘅原因之一所以志文最後都係要靠畫啲著名武俠小說如"絕代雙驕"先至可以維持下去



2012年4月11日 星期三

何志文(百八龍)。八卦雜誌

百八龍即係志文嘅另一個筆名!"八卦雜誌"又係一套志文比較另類嘅漫畫,內容就如其書名,講述當時社會大熱嘅娛樂八卦新聞!唔係真係八卦雜誌,但就係八卦雜誌式嘅漫畫,而書中主角周星星就係"八卦雜誌社"嘅娛樂記者。
以第一期為例,標題"一脫求名"封面女主角一睇就知講邊位同講乜內容啦,而書中又確是有女角"一脫"嘅鏡頭,可能係志文執筆以來畫得最暴露嘅,不過就唔登出嚟咯
這套書喺1992年由"自由人"出版,不經不覺亦己有20年歷史了,只得兩本,而且係寫明"試刋",即擺明唔慌會出多幾期!



2012年4月8日 星期日

何志文。機甲之夢

機甲之夢應該係志文90年初首套嚐試加入電腦制作嘅漫畫。今次就分享下志文喺20年前獨資出過嘅一套咁正漫畫!
志文呢套科幻故事,我只能以"勁正"來形容,但非常非常可惜只出咗兩期便爛尾,個人真希望此書能够出多少少.......
此套非簿裝每期厚成50頁,粉紙、月刋形式出版,成本太貴,故喺90年代都要賣成$28咁嘅價錢,讀者亦好難負擔



2012年4月5日 星期四

何志文。龍虎風雲

志文,80年代初出道,可以講係一個好有天份嘅主筆,覺得佢畫鬼故同愛情故事真係一絕架,但佢又真係嚐試同畫過好多好多唔同嘅題材,流氓律師、八卦雜誌、波動少女、八仙飯店、車神、百八龍、笑傲星河、爾國臨格、重案傳真......睇佢啲書係非常之開心嘅,感覺上真係有非常多又豐富嘅題材!介紹佢啲書我相信用盡兩個月時間都未必得!
最欣賞佢早期、或間中都有與上官小寶、黄玉郎、馬榮成合作下,但大多數都係可以一直獨立創作,咁嘅主筆、漫畫人唔支持佢?支持邊嗰呀?志文,休息完就快啲返嚟啦,好多讀者等緊你架
今次介紹呢套"龍虎風雲"係因為唔少朋友都提及過,似乎好多人都想睇返下!套"龍虎風雲"喺當年係比較另類題材,係屬好早期嘅江湖書類,可惜當年唔係由大公司出,另類題材無咗足够宣傳同"慣性收視"根本做唔住,所以只出咗五期就摺咗,但必須公道講句,這是一套非常有誠意同唔錯嘅作品,係志文作品中必看推荐



2012年4月2日 星期一

上官小威/松森 正。怪談

上官小威+松森  正????無搞錯!因為這套兩本"怪談"係由小威畫封面,內文係松森  正啲故事,而這兩本嘅出版時期,係70年代尚比橫版港漫更早!
當年沒有正版日漫,而松森  正係當年嘅熱門漫畫家,果時好多香港主筆包括馬仔都深受其影嚮架,馬仔套"魔鬼實驗"就好有松森  正feel喇,詳可參考:http://blog.yahoo.com/_AIJTCUABVJ56MSVGALLVUP2MBA/articles/75284/category/%E9%A6%AC%E6%A6%AE%E6%88%90%E4%BD%9C%E5%93%81
這兩本由小威操刀畫封面扮港漫嘅日漫書,唔慌會出得多,松森  正嘅絕版兼無出過中文版,加埋這類冷門两溝嘅公仔書,都幾值得收藏,有時keep返幾本拎出嚟揭下都幾過癮幾懷舊架