2012年9月26日 星期三

冷門二毫子書仔part 3


今期又登返幾本70年代細書,呢類咁多年前嘅書仔,唔須計較主筆嘅名氣及畫功,也無須讚彈故事內容,因咁耐歷史嘅書,本本都己經入於冷門,想揾返本相重嘅都好難,
而這些書嘅作者同主筆亦都好難再深入考究了,但就可以作為一個歷史見証同產物,見証咗自60、70年代起開始蓬勃發展及題材種類多樣化嘅公仔書時代開始.....



黃金城。飛女王

2012年9月23日 星期日

漢民、馮志明。綜合漫畫東方之豬

若數返3、40年前嘅綜合漫畫,絕對唔太多,因為當年綜合漫畫好難有生存空間(當然現今嘅情况就更差),長壽嘅綜合漫畫更加近乎零,大家熟識嘅臭香港、金漫畫、73漫畫等都至多得十零期貨仔,
到了80年代,才有最長壽嘅"玉郎漫畫"出現,而70年代當中綜合漫畫之中較少見嘅冷品便要數到這本"東方之豬"了。
這本70年代8毫子裝綜合漫畫,主筆眾多,乃包括江海濤、林步陞、高麗心、小依人(漢民)、梁天尺、馮志明、晚霞、念曾等等....當中以漢民及江海濤所佔全書比例最多,可謂本書主筆中嘅主筆!
而漢民作品出現於一本綜合漫畫亦不多常見,漢民就用咗"小依人"及"上官夢妮"两個筆名在本書出現,用"小依人"為筆名嘅書己不多,而知道漢民另一個筆名"上官夢妮"嘅更加少之又少吧!再加上馮志明最早登場嘅諷刺時弊作品,形成這本書好有紀念價價!



2012年9月20日 星期四

時代漫畫

80年代出過一些8開本週刋漫畫,如漫畫周刋、2001、漫畫王等等,不過亦有一些好"短期"嘅8開本漫畫出現過,這類漫畫書分分鐘一不留意,便己錯過,
"時代漫畫"便是其中一本,而比較嘅這本"時代漫畫"裏面所連載嘅漫畫故事,港、日各佔一半,其實書內所連載嘅故事同內容都唔錯,算是幾吸引,但出咗一期之後,唔再見到有第二期,比較可惜....



2012年9月17日 星期一

上官小强的漫畫世界之:濟公系列

上官小强在未出成名作"壽星仔"之前,一路畫下咗極多嘅細書,所引用嘅筆名,亦可算是最多嘅一個漫畫家之一,計有陳少强、凌霄、狄龍、陳小强、陳少林等等...
而作品中除了有佢大量創作出來嘅人物之外,還有一些好熟識嘅抄作角色,超人、獨臂小刀王、十兄弟、小流氓、蝙蝠俠、黃飛鴻、小魔神、孫悟空、哪咤、豬八戒等等大量crossover,是其作品一大特色,同時期主筆漫畫家無出其右者!也正好反映小强當年如何"食腦"去利用將二次創作人物加入其作品內,以吸引及增加其作品吸引度及銷售量!
濟公兩仔爺就是在其筆下世界所形成嘅其中一個系列,小濟公激奀小傻仙、濟公兩仔爺激奀豬八戒....淨係睇書名都够得意啦



2012年9月14日 星期五

鄭問。星雲大師

鄭問應該是港人最熟識及台灣最具名氣的漫畫大師,佢又分別與黃玉郎馬榮成合作過,在港出過漫畫作品,佢嘅功力同作品在行內無容置疑,
一般港人比較熟識嘅係佢嘅"阿鼻劍"、"刺客列傳"又或者係"大霹靂",
而這本"星雲大師"雖並非年份久遠嘅舊書,大概是2000年出版,在台灣亦一定有好多人知道,但在香港就冇咁多人會看到吧。
我早知鄭問出過這本書,但都是近期輾轉之下托朋友alanwen及丹下兄嘅blog友"老劉"在台灣幫忙購入,在此嗚謝劉兄了!
講返這本"星雲大師"內容是以全漫畫形式述說介紹台灣好出名嘅星雲大師一生事蹟,是一本漫畫傳記,鄭問將星雲大師從細到大以傳記形式用漫畫畫出來,是鄭問迷必儲嘅鄭問作品!




2012年9月11日 星期二

武振天、白雲天。小霹靂、小蠱惑、義和團小英雄


今期武振天、白雲天可能大家都有聽過,但係佢哋這幾本陳年作品又有幾多人看過或有印像呢?這些70年代6毫子8毫子書,類似係想與小流氓李小龍在市場上分一杯羹,但好多都只係曇花一現或者爛尾,
歸根結底,通常都是畫功唔得或者是故事唔得,而今幾套又是屬於哪類?
小霹靂、小蠱惑,真係甚冷門非大路書,我都只儲返第一期便算了,但其之後還有冇第二第三期,又或者是爛尾,唔知有冇朋友知道呢?至於白雲天嘅"義和團小英雄"也不知道究竟出咗幾多期?因為這些書及主筆非在下主要收藏對像,所以並無太刻意收集各期數,故這套"義和團小英雄"一直還欠前面嘅幾本



2012年9月8日 星期六

崔成安。銀燈淚影、愛海情花


崔成安一直係我最欣賞嘅漫畫家、插畫家,因為佢畫功一流、筆藝高超,喺幾十年前己經可以稱之為大師級。但佢嘅作品一向唔太多,細書時代嘅作品就更少見。
港漫言情漫畫愛情漫畫一早就己存在,不過現時就己經絕晒跡,現在要睇返呢啲題材類,就唯有睇返這些前輩級嘅作品。
"銀燈淚影"封面設計以幾十年前水準,我己覺得好靚,內文入面公仔繒圖技藝,放誅當年嘅細裝書黎講,比對之下,應該是無人能及了!
至於另一本"愛海情花",觀乎內文公仔,則應該是年代更為久遠嘅崔大師作品,而兩本皆為6格一頁嘅格式。



2012年9月5日 星期三

漢民。凶女

漢民嘅橫版書,一向是市場罕見,可謂本本難求,而佢嘅橫版書又大多以鬼故書居多,但這本"凶女"就是一本非鬼書類,而是屬於社會奇情故事,
而鑑定這本咁靚嘅封面、咁另類嘅題材,這本就係非常具收藏價值嘅漢民橫度書之一!而這本亦是本blog介紹嘅第四本漢民橫版。
睇返畫功,喺70、80年代,己經有咁樣嘅畫功,畫到咁寫實嘅公仔,香港也就只有漢民同馬榮成,所以佢哋嘅舊作本本價值非凡,實在是不無原因!,
"凶女"故事算是幾吸引,兼且畫面意識頗為大膽,故事講美麗女主角凱絲琳是一位不祥人,先後下嫁的13個丈夫都不得善終死於非命,凱絲琳不甘受命運擺佈,决定去貧民窟找一個最醜最窮嘅男人下嫁,不料該男人除醜陋無比之外,還很惡毒,經常折磨虐待凱絲琳,
但這個男人卻又偏偏活得最長久,最後凱絲琳忍無可忍,親手將她這任丈夫殺死,凱絲琳始終擺脫不到"凶女"嘅命運!



2012年9月2日 星期日

上官小寶。小白龍

因為有一些陳年舊書積壓,今個月主題又會係偏向冷門、舊嘢多一些,一些現今或當年成名嘅主筆漫畫家嘅一些較冷門少見嘅著作,會排隊推出!
今期這本是上官小寶70年代神怪作品,"小龍"牌出品,全書有兩段飛俠小白龍故事,己經完整完結,而這本書還有第二期,至於有沒有出過第三期,就不知了,因為我都未在任何地方見過第三期。
本書故事講邪惡黑道士召喚出黑白雙屍控制村民,村民求助於飛俠小白龍將雙屍殺敗,伸張正義!另一段故事係講山中貓妖作怪,殘殺居民,小白龍為民請命惡鬥貓妖!