2013年4月29日 星期一

上官小强。壽星仔 part 3(92-200集)

1982年,壽星仔第92期開始由橫版轉為直版,1-91期嘅壽星仔橫版時代正式結束!
92期開始直版壽星仔,强記又續繼穿梭時空創作了好多段令人捧腹大笑嘅故事,我哋就一齊來重温一下92至到200期這些得意搞笑又可愛嘅壽星仔封面



2013年4月26日 星期五

林海峰、上官小威。今生無悔、妖獸迷離夜

林海峰係DJ、藝人,好多人都識佢,但係佢都畫過唔少漫畫架,唔係睇開漫畫嘅朋友就未必知(但係咪同一人,保留求証呀)!
本書由三段故事組成,題材分別為言情、鬼怪及科幻,分別由上官小威、林海峰、劉炳輝執筆,這本咁冷門嘅漫畫同題材,在80年代尾90年代初還可以出到,實屬難得了,不過印得少、銷量低,恐怕都好少人見過這本作品。
林海峰嘅"妖獸迷離夜"係講魔鬼考驗人類承諾嘅故事。
上官小威嘅"今生無悔"係講男主角同時愛上兩姊妹嘅不淪之戀......
劉炳輝嘅"M-Z"係講超能力嘅故事......



2013年4月23日 星期二

鄭健和、袁家寶。風雷

"風雷"是海洋1998年出品,袁家寶、鄭健和都係在下幾欣賞嘅漫畫人,鄭健和近期負責嘅"殺道行者"、"封神紀"、"脫北者",雖然在下尚未睇過,但均口碑唔錯,而佢早期還有拳皇96、凶獸武者及這套"風雷",我就覺得"風雷"就係佢早期代表作!
這套書不算太耐歷史,相信好多港漫朋友都有睇過,也就不作詳細介紹了。"風雷"第一輯全套40期,第二輯全套10本完,袁家寶主編、鄭健和編繪,特別一提;專欄設計係金城先生


2013年4月20日 星期六

漢民。偷屍

漢民鬼書從橫版時代計至到90年代直版,約共300多本,雖然大多係一期完結,但漢民橫版70多本加上後期直版書200多本,形式上與龍虎門、李小龍、壽星仔由橫版轉為直版繼續出版大致相同,都是經歷咗由橫版轉直版階段。
漢民橫版70多本,與龍虎門橫版、李小龍橫版、壽星仔橫版、鐵血螳螂橫版,都係出咗最多期數嘅五大橫版港漫書,而漢民橫版收藏難度排行第一!漢民橫版唔係全部是鬼怪題材,但可以入於怪異懸疑類。
喺橫版時期其實還有好多畫家、主筆,佔最多係打書,但係有大量呢類橫版打書都係爛尾收場或是草草了事,當時爛尾例子屢見不鮮、見怪不怪,而當中能夠長出長有,由橫版過渡至直版,至到最後而又能完整完結嘅,只有區區數套,而這數套嘅主筆作者就奠定咗日後嘅畫壇地位,分別就係龍虎門嘅黃玉郎、李小龍嘅上官小寶、壽星仔嘅上官小强、同埋鬼書之王漢民,佢哋分別在武打書、搞笑、鬼書各範疇成為今日港漫嘅代表者!
而喺當年大量橫版打書(少說也有8成以上)都只能維持幾期、十幾期便爛尾嘅風氣下,漢民先生嘅橫版書沒有彩色、人物少角式少、背景灰暗、冇任何精彩嘅打鬥場面,但係都可以出到70多本,何解?或者就只有靠以下原因:氣氛營造出色、畫功好、劇情內容吸引,漢民作品因而建立咗追看意慾同信心保證!而睇返至今所有開過blog嘅資深漫畫收藏家,幾乎全部都有漢民先生嘅珍藏書,當中更有多位視漢民作品為重點收藏者,舊作存世量一向罕而少,而收藏者眾,以致漢民舊作品價值高企不無原因!
這本"偷屍"並非鬼故,但係淨睇封面或是幾頁內容,都會覺得幾恐怖,對喜歡怪異玄疑嘅讀者,會有興趣同吸引力去追看內容,因為本書中晒上面所講;氣氛營造出色、畫功好、劇情內容吸引嘅元素!
故事係講男主角喜歡到墳場盜墓,同女屍親熱嘅變態嚇人行為,最終天網恢恢當然沒有好收場,但係又不涉及鬼魂復仇,結局出人意表,未到最後不知結果,這就是內容吸引之處!



2013年4月17日 星期三

嚴志超、方維新。人在江湖

這本嚴志超、方維新合作嘅江湖書,出於80年代尾,大概與"天下"同時期出,但係有幾多人留意過這本書?這本甚冷門嘅早期江湖書種,啲畫功尚算OK,而嚴志超啲畫風,就學足池上遼一,本書應只出過一期便無疾而終,故事都係講江湖仇殺,劇情就普通一啲啦啲舊書水準也有參差,又唔係部部都高水準嘅,但作為冷門舊書來睇還可以架



2013年4月14日 星期日

謝志榮。警世勵人反思的最後一星期、冥冥中自有主宰的生靈

謝志榮嘅80年代橫版鬼書並唔係出咗太多本,同漢民鬼書一樣,己經好少再見到了,這本"生靈"共連載咗兩段故事,"生靈"之外,還有"最後一星期",並由黎智昌協力,應該是黎智昌最早期有份参與嘅作品了。
內容方面;
"最後一星期",三個病人被醫生告知只有一星期生命,三個不同命運、不同階層背景嘅人,他們用三種唔同方式去面對死亡,而最後嘅結果亦都各自不同!警世勵人反省,這類故事現今睇雖己非新鮮,但是咁多年前嘅漫畫可以出到這類題材同故事,依家港漫冇這類引發思考嘅漫畫!
"生靈",女主角被壞人追殺,丈夫憑耳邊出現嘅奇異幻聲指引趕到案發現場救出妻子,送院檢查原來己經懷孕,咁男主角耳邊的呼叫聲是否妻子肚內嘅"生靈"在危急情救了母親呢?
兩段故事都唔算鬼故,而畫面簡單,沒有豪華細緻嘅背景、沒有絢爛瑰麗嘅色彩和招式,但係那時嘅畫中氣氛、故事情節,今時今天再睇返一次,都仲覺得好睇過而家嘅書喎!
點解?!唔係話依家啲書畫功差咗、畫面曳咗,但係一味靠打嘅內容同情節,打咗4、50年嘅港漫主流,今日還就只能留住少量讀者!沒有小朋友啱睇嘅益智啓發思考想像力如"叮噹"、又沒有女性讀者啱睇嘅愛情故事類和男女都啱睇嘅懸疑鬼故類,所以讀者群越來越窄得返一小撮追看咗幾十年打書嘅"大朋友"睇漫畫,只剩返一少撮"大朋友"睇嘅漫畫而缺少咗啱小朋友同女性讀者啱睇嘅漫畫,單一化、空泛、一味靠打,趕走咗其他類型讀者嘅漫畫市場,餅只會越做越細,是畸型同走向末路嘅發展!
睇開在下blog嘅朋友,都會清楚在下儲書嘅題材是多元化,所以至唔鍾意就係睇到今日咁單一乏味嘅局面,也正正是這樣才會覺得現時嘅港漫趨勢越離譜,有資金但冇心機冇勇氣嚐試其他題材、害怕失敗者,就唔好怪讀者離棄了!

本篇執筆發帖之前,有位本blog讀者,私下都有好多次email聯絡同傾談,他告之在下將會訪問謝志榮先生,故在下配合本篇也摷返本謝生舊作刋登,也祝你訪問成功


2013年4月11日 星期四

許景琛。蝎王、赤蝎鬥魂


許景琛多年前嘅"街頭霸王"遊戲打書,銷量紅爆,打敗咗唔少傳統港漫,許景琛風格獨特,實有別於現時一眾港漫打書,自"街霸"之後,陸續又出過唔少同類題材嘅書,成為港漫遊戲打書題材嘅代表者!不經不覺,原來佢嘅作品非常之多,數以百本計,遊戲打書熱潮過後,又創造出西方式嘅變身英雄"蝎子人",令到許景琛嘅漫畫又再延續了一段時間!
港漫畫家除邱福龍擅於畫這類西方式嘅變身英雄漫畫之外,就只數到許景琛了,邱福龍有"龍神",許景琛就以"蝎子人"為主角,創造出"蝎子"三部曲,"蝎子人"嘅故事共分為三部,分別為第一部"赤蝎13"全套共72本,第二部"蝎王"共52本及第三部"赤蝎鬥魂"全套共11本。
今期率先介紹第二部"蝎王"及第三部"赤蝎鬥魂",當中2001年出版嘅"蝎王"又共分蝎王1、2、3部,"蝎王1"由1-15期,"蝎王2"由16-49期,"蝎王3"由50-52期,共52本,故事未完,不過冇再出......



2013年4月8日 星期一

池上遼一。飆車小子

這套是極早期池上遼一作品,70年代初出版,以出版年期排,是池上遼一第一套作品,香港沒有出過中文版,只有台版,一套5本,單車運動漫畫,描述主角刻苦奮鬥而成為出色單車手,以單車運動做主題嘅漫畫,係池上作品中首見,沒有飛天遁地、天馬行空嘅故事同畫面,但是故事一樣緊湊精彩,而作為第一套作品,比起其他初出道嘅漫畫家,畫功己經可列入超級之列!若作為池上遼一嘅粉絲,這套"第一"作品是必要收藏的!

主要作品

長篇




  • 1973 《一人ぼっちのリン》飆車小子
  • 1973 《阿緣之戀》
  • 1973-1977 《餓男》
  • 1974-1979 《男組》
  • 1974 《殺愛》
  • 1976 《蜘蛛人》
  • 1976 《羅修人》
  • 1980-1982 《男大空》
  • 1983-1984 《星雲兒》
  • 1983-1986 《傷追之人》
  • 1984-1985 《青拳狼》
  • 1984 《暴民》
  • 1985 《野獸傳說》
  • 1985-1986 《舞》
  • 1987-1988 《哭泣殺神
  • 1987-1990 《信長》
  • 1988-1990 《赤鳩》
  • 1990-1991 《帝王之子》
  • 1990-1995 《聖堂教父
  • 1991 《BOX黑街拳王》
  • 1992 《王立院雲丸的生涯》
  • 1995-1996 《今日子》
  • 1996 《奧迪賽》
  • 1997-1998 《喋血煞星》
  • 1999-2004 《HEAT灼熱》
  • 2000-2003 《流月抄》
  • 2003 《砂時計》
  • 2004 《されど狼》
  • 2004-2011 《霸》

2013年4月5日 星期五

藤子不二雄A。忍者小靈精

叮噹多啦A夢、Q太郎、神奇小子......都係藤子經典大作,就算唔睇日漫嘅朋友,都會知道這幾套頂頂大名嘅作品吧!日漫就永遠存在着這類漫畫作為調劑嘅作用,而且都係極受歡迎同尊重,其影响力不局限於本土,而是達至名揚海外!
忍忍忍忍....藤子不二雄 A嘅另一套名作"忍者小靈精",主題曲深入民心無人不識,"忍者小靈精"書內人物小靈精、健仔、小玲瓏、獅子狗、甘麥基、俏皮猫......耳熟能詳,故事結構簡單,漫畫簡潔易畫,但能瘋魔萬千讀者,是為漫畫至高境界!藤子不二雄嘅作品就有這種魅力!
日本富山縣的冰見市,這裏正是"忍者小靈精"之父藤子不二雄 A 的故鄉,全市有"忍者小靈精"專設火車、人物塑像、博物展品館,充份體驗咗日本政府、市民對漫畫作者嘅尊敬和喜愛!
"忍者小靈精",1964年首連載於漫畫周刋內,較叮噹更早成名,香港TVB無綫於1983年首播"忍者小靈精"卡通,其後文化傳信出版全套共16本"忍者小靈精",直至今時今日相信大家都還記得"忍者小靈精"吧!



2013年4月2日 星期二

上官小强。壽星仔 part 2

我都識得一啲朋友,特別鍾情於70、80年代嘅橫版書系列,大低香港橫版連環圖時代只係幾年嘅光景便被直版取代,時間甚短,橫版書出得不算太多,但是本本都算得上印刷精美、五花八門題材吸引,加上橫版書除龍虎門之外,極少有再出復刻版,所以買少見少!
儲漫畫書嘅朋友,一般是以作者、題材去分門別類儲,但亦有少數以橫版系列嘅專項去儲書,專門去收集橫版漫畫,也會是一項非常不錯嘅專項收集!
壽星仔從1-91期共有91本橫度出版嘅書,自然就成為擁有最多嘅5大橫版書之一,其他嘅5大橫版書類別,仲包括了龍虎門橫版、李小龍橫版、漢民橫版、鐵血螳螂橫版,每套全部超過60本以上嘅橫度書,是為"五大橫版"!
其中"壽星仔"91橫版收集難度,在5大之中排行第2,儲齊整套橫版壽星仔有極大難度,而今次 part 2就將所有21-91期壽星仔橫版書登晒出黎,當中還欠6本,若日後揾到會在這裡補貼返!