2012年5月17日 星期四

第100篇:程BLOG之誕生,回顧總結之前、展望將來!

不經不覺,己經寫到第100篇,本來今回原定係POST啲私伙收藏書出黎,但回想100篇,對於寫網誌來說,只不過係微不足道嘅一個個人BLOG,大把BLOG早己超過一千回,但係單純只以全懷舊漫畫書為主嘅BLOG,又並不多!喺一百篇之前,真係未曾有同大家長篇大論吹過水,所以趁這第100篇不如來個總結、回顧加展望!
回想喺一百篇之前,為何會開始第一篇?這其實與在下一向"人棄我取"嘅儲漫畫習慣一樣.....
原因在前幾年寫漫畫BLOG較興盛嘅時期,在下並無任何參與過,因為有好多收藏漫畫書嘅BLOG友各自開BLOG,拎晒啲陳年珍藏家檔出黎分享,一時情況好不熱閙,在下都樂見大家嘅私伙珍藏此起彼落地新鮮上BLOG!
不過玩咗兩三年眼見好多BLOG友啲"珍藏"品都SHOW晒,加上FACEBOOK大行其道,漫畫BLOG己經日漸減少中......有一次同位朋友傾開,佢話:而家啲漫畫BLOG好似漫畫市道咁,越開越少越淡靜,你既有咁多書,點解唔整理下開返個BLOG去填補一下己日漸流失嘅漫畫BLOG?
基於這番話,同埋我"人棄我取"嘅習慣,我選擇咗開BLOG而唔用流行嘅FACEBOOK!"程BLOG"就誕生咗!
開咗BLOG之後先發覺其實寫BLOG某程度上好似儲漫畫嘅精神一樣,必要有恆心、忍耐力同堅持,先至會有少少成績!
而就開BLOG前觀察所得,過去到現在,超過9成以上嘅"漫畫BLOG"都唔係百份百純寫漫畫為主,而係會夾雜埋其他相關題材,又或者將漫畫成為BLOG內其中一個欄目,這又難怪大部份BLOG主會這麼做,因為若單單靠寫漫畫為主,而不加入其他漫畫以外嘅題材,就好難維持到長期有足够嘅"書"去供應,故此絕大部份有寫漫畫嘅BLOG主都須要兼顧寫埋其他漫畫以外嘅項目或題材,這樣好處是個BLOG會多元化,個BLOG又能够長期維持經營下去。
回說"程BLOG",在下雖然都還有好多其他嘅嗜好同收藏,開BLOG前也曾考慮是否可以加入其他漫畫書以外嘅主題?但想到"程BLOG"既然最初嘅目的係為"漫畫書"而開,就希望直到本BLOG最後一篇,都係會以純漫畫書為主題!
"程BLOG"將繼續咁着重於以"漫畫書"為基本嘅宗旨,至於其他屬於"漫畫書"以外由漫畫衍生出黎嘅副產品及漫畫周邊,例如漫畫專欄、刀劍兵器、漫畫咭、特別版、手辦模型....等等,就唔會有太多介紹,至多會間中介紹下海報啫。而這些副產品、漫畫周邊、漫畫專欄等就交給其他BLOG友介紹好了!
另外,本BLOG雖然係以介紹舊書為主,但並唔代表會守舊、一成不變,更會不斷開闢一些之前從未有BLOG主探討嘅主題同項目,例如之前加入反應相當唔錯嘅"朋友嘅珍藏分享"就係幾特別嘅構思,而最新加入嘅"六大港漫"系列同"五大鬼書"系列,就係包含咗港漫之中最精彩最珍貴嘅部份!也是所有港漫讀者都會涉及嘅範圍!
在此略略介紹一下本BLOG在接下100篇所加入嘅新欄目;"六大港漫"系列、"五大鬼書"系列,先講"六大港漫"系列,故名思義就係排在香港最前列嘅6套港漫,係在下以各套漫畫嘅歷史、知名度、受歡迎程度、珍藏價值度、齊套嘅艱難度、作者實力與知名度、銷量、期數等等而區分評定出"六大港漫",我依照齊套嘅艱難度排序,分別為李小龍、小流氓+龍虎門、醉拳、如來神掌、中華英雄、刀劍笑,
"五大鬼書"系列,分別為怪異集(570本)、猛鬼冤魂(228本)、怪談(165本)、靈周刋(121本)、72行鬼禁忌(72本),"六大港漫"同"五大鬼書"相信這兩個系列就係港漫之中最難集齊嘅三個頂級系列嘅其中兩個!當中即使係我所有識得嘅收藏漫畫朋友,都還未有人集得到這兩個系列共11套書之中任何2套者!我可以講若有任何朋友可以集齊這兩個系列當中嘅任何4套書,己經可以列入"傻佬"嘅級別!而"六大港漫"、"五大鬼書"就係介紹這11套最具難度和挑戰性嘅書!
就講住咁多先,下次再"吹水"嘅時間可能要係第200篇啦

第100回同場加映:刼後重生、圖書歸位

以下大家睇到嘅係本人數年前力戰蛀書大蟲(白蟻),劫後重生,圖書歸位前嘅片段,當時最傷係被大蟲註掉整套前800期李小龍及其他唔少正書,令我要花足近5年時間才只能搜集返6成嘅失書

大戰遇後,將刼後餘生嘅書全部重新入袋....





















淨睇前面冇乜事,其實後面己中晒招





















下回本BLOG第101篇,在下絕版私伙一套,咪走雞
........







































































































































































30 則留言:

  1. 嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩嘩..............⊙﹏⊙,你實在太太太太太太利害了!!這是你家裡??很大地方,這可能我一世都睇不完的珍貴讀物,睇來你你你要起碼寫四百回以上才能完全show得晒.....,但只要程兄肯寫,我就會一定支持到底Y(^_^)Y
    [版主回覆05/18/2012 09:34:59]eric兄,我地方唔係好大啫!不過啲書我自己都冇辦法睇得完就真嘅
    好嘢!你估計得差不多喇!依照現在嘅排期,己經至少要寫到500篇,多謝你捧場先,如中間無乜意外都會寫落去,謝謝!

    回覆刪除
  2. 先恭喜你100篇網誌,無錯,100篇唔係咩里程,我個爛鬼BLOG都有,但只分享漫畫我就無見過,故好佩服你嘅堅持同水準

    見程兄嘅收藏,真係「O」晒嘴唔識講嘢,個心不停講:「黐X線!!」對唔住,我唔係對你無禮,但你啲藏書真係好堅,我唔用粗口都唔識用咩形容,以為只有網友丹下段平咁堅,世上原來仲有程兄,相信你朋友都係咁恐佈不過你同佢一樣,啲珍藏都被白蟻咬過,真係好慘。

    壽星仔四十週年有搞作,唔知你有無收藏?另外期待睇你嘅私伙。
    [偉回覆05/18/2012 10:31:31]程兄同丹下大哥都係-------------黐X線!
    [版主回覆05/18/2012 10:02:05]丹丹兄你啲書倉+玩具倉我點够你黎呀?何況你仲有咁多其他收藏品
    [版主回覆05/18/2012 09:56:34]偉兄:只分享漫畫嘅blog,仲有一個馬來西亞嘅Wee Chye兄,佢9成9嘅網誌都係寫漫畫!
    我諗我都未算最多嘅,好多人都有書倉啦!儲書被蟲蛀、受潮、被老媽子强迫丟書,都似乎係書友必經過程
    我梗有收藏壽星仔啦,你見我嘜頭都用壽星仔就知啦!
    [丹下段平回覆05/17/2012 22:04:18]偉兄............我堅條毛咩!睇完阿"程程"我直頭縮陽呀!~

    回覆刪除
  3. 嘩........乜咁誇張
    [版主回覆05/18/2012 10:04:46]唔誇張,這己是6、7年前嘅相咯,依家仲大規模

    回覆刪除
  4. 你開漫畫店??咁勁??
    對你既鬼書最有興趣,呵呵!!
    [版主回覆05/18/2012 10:08:28]我間漫畫店係唔賣書唔租書借書架鬼書我至鍾意,包你滿意!

    回覆刪除
  5. 恭喜,兒董樂園呢?都應該入10大
    [版主回覆05/18/2012 10:13:53]WALLACE 兄,兒童樂園似乎算係"兒童讀物"多啲噃,加埋這裏以"連環圖"為準則,不過歡迎大家提出各自意見或提名架

    回覆刪除
  6. 程 blog 好睇
    程倉好勁
    [版主回覆05/18/2012 10:14:44]最緊要你鍾意就得啦

    回覆刪除
  7. 程兄這漫畫寶庫,簡直是漫畫迷的世外桃源!
    我們漫畫迷心目中,這些漫畫書,比黃金還要珍貴呢!
    [版主回覆05/18/2012 10:18:49]好多書我都未齊架。不過同意喺漫畫迷心目中,啲書吸引過黄金,喺漫畫迷心目中,書嘅價值係會貴過金架!

    回覆刪除
  8. 李中雞 @ 武學之巅 @ 武學之癲人2012年5月17日 下午5:20

    這⋯這是亞努亞圖,我想住嘅地方
    [版主回覆05/18/2012 10:20:24]咁犀利

    回覆刪除
  9. 程兄的網誌昂然進入第100篇紀念,恭喜恭喜。
    程兄的網誌,精彩紛呈。
    小雞,中雞,大雞聯合敬賀
    [版主回覆05/18/2012 10:21:24]多謝雞氏三兄弟先

    回覆刪除
  10. 你................係咪人嚟架?
    [版主回覆05/18/2012 10:24:11]我啲一味獨大無用架,丹丹兄啲千奇百趣收藏先至勁

    回覆刪除
  11. 百分百書城,祝一百篇誌慶!
    [Jim Lai回覆05/18/2012 11:38:27]十份一
    [版主回覆05/18/2012 10:26:25]多謝先!我諗我個書城無你大哥個倉十份一大囉

    回覆刪除
  12. 痴x線架你.........本本我都無>_<
    [版主回覆05/18/2012 10:30:30]我諗你都有唔少嘢係我無架,好多書你都比我更加清楚!

    回覆刪除
  13. 嘩程兄,你整理D書,都好辛苦下.....
    [版主回覆05/18/2012 10:32:15]係呀!每次一郁就死咁濟,好大劑!只好安慰自己當做運動囉

    回覆刪除
  14. 有無辨法滅蟲呢?
    [鐵人回覆05/18/2012 21:02:13]利害,利害....^^"
    [偉回覆05/18/2012 15:49:45]長開抽濕機都應該可以幫到下手
    [版主回覆05/18/2012 10:44:29]真係好難搞,如果好似我咁大劑,滅蟲就如星球大戰一般,蟻巢內成千上萬白蟻你必須保証一個不留殺滅,否則一用殺蟲水白蟻就會四散到每一角落,然後繁殖,蟻巢可以一個變十個,所以一發現有白蟻千祈唔好妄動,要一網打盡一隻不留至得!

    回覆刪除
  15. 痴Q線架!!!!
    咁6大港漫、5大鬼書你己經齊晒??????想知道6大港漫、5大鬼書之外,第三大系列是什麼???
    [版主回覆05/18/2012 10:56:05]11套之中我好似己經齊咗8、9套咁啦,所以你話我痴Q線都啱嘅
    6大港漫、5大鬼書之外,第三系列其實比5大鬼書,甚至6大港漫難度更高,因為我仲唔係好齊,我驚講出黎個個走去揾咁我就無得淨啦,等我揾齊啲先啦

    回覆刪除
  16. 100篇可喜可賀
    你真係好好好多收藏呀 大開眼界!! 你d書放向屋企架?
    [版主回覆05/18/2012 18:47:24]多謝。
    其實唔少發燒友都有返咁上下收藏量架

    回覆刪除

  17. [版主回覆05/18/2012 18:47:19]

    回覆刪除
  18. 好多書呀,放書地方用左你幾多地方?仲要本本有袋包....勁!
    唔知有冇我書,我04過一本的.......
    [版主回覆05/18/2012 18:51:49]啲書確係佔用咗唔少地方!本本有袋就比較安心啲
    其實嗰幾年己經停咗買新出書,不過現時又買返,放心,見到你大作我一定會收藏架

    回覆刪除
  19. 弓起晒!!
    [版主回覆05/18/2012 18:53:15]多謝晒

    回覆刪除
  20. 見到都開心,志同道合,不過你多好多,真想探探你
    [版主回覆05/20/2012 09:14:55]我諗你都唔少囉!尤其是的好舊既書!

    回覆刪除
  21. 真係好多書呀
    [版主回覆05/20/2012 09:20:47]麻麻地咁啦,你都有冇儲呀?

    回覆刪除
  22. 除左勁抽......仲係勁抽
    [版主回覆05/21/2012 10:20:42]你都有好多玩具、模型啫

    回覆刪除
  23. 收藏漫画,钱还是其次,最大难题是空间。我也想发表更多漫画网志,不过精力不足,亦有些漫画买後長期未看。

    而一般人之居所都是钢筋水泥,非木构建筑,敢问白蚁是甚么来源?
    [版主回覆05/21/2012 10:27:58]一般喺舊書檔買咗啲舊書未清好,可能帶有蟲卵,又或者雨季飛蟻入屋就有白蟻。越多書越容易發生嘅。總言之,受潮與蟲患,都係儲書者大敵,必須小心

    回覆刪除
  24. She~She~She~!!!!!!
    [版主回覆05/23/2012 10:41:46]

    回覆刪除
  25. 100篇啦! 恭喜! 恭喜! 期待你的200篇!
    [版主回覆05/25/2012 09:56:59]多謝!200篇眨眼間好快就到

    回覆刪除
  26. 勁!! 第時攪漫畫展覽要搵你借展品喇 ^0^ 哈哈~~~~~
    [版主回覆05/27/2012 22:09:30]展品?講笑喇,幾時輪到我呀

    回覆刪除
  27. 真係要小心書蟲;你咁多書,除時壓親;有無數過你真正的書量?我認為facebook始終不能暢所欲言.
    [版主回覆05/28/2012 09:14:05]真係冇乜點過有幾多噃,但我都驚比啲書跌黎擲親
    習慣咗睇blog就一直冇乜留意facebook

    回覆刪除
  28. 很厲害的藏量~ 可以長寫長有呀~!!
    [版主回覆05/29/2012 10:25:34]應該冇問題嘅

    回覆刪除
  29. 你真係堅@@
    [版主回覆06/05/2012 12:49:23]儲書嗜好啫

    回覆刪除
  30. Do you sell this comics to other country? Malaysia maybe. I interested in buying Hong Kong's Bruce Lee comics by Shangguan Xiao Bao.

    回覆刪除