經典鬼書怪異集合訂本1-22期，其實非怪異集之內嘅作品，而係怪異集之前嘅漢民作品，所以係非常值得收藏，但合訂本與原裝版唔同嘅係合訂本內文係黑白，原裝版部份係彩色，所以合訂本同原裝版就有咗兩種唔同嘅特色！而黑白版同彩色版本係鬼書上嘅兩種截然不同氣氛，比之其他題材種類書係黑白同彩色版嘅差別同感覺都大好多。
同時1-22期之內，還有幾個橫版故事，係從未出過任何單本的，所以又係一個須要收藏嘅理由，而22期開始即為"怪異集"最早期嘅故事。
一套怪異集合訂本包含咗漢民喺畫怪異集之嘅前近30本直版故事、幾個從未出過任何單本的橫版故事，加埋有齊佢所有怪異集內嘅作品，紀錄晒漢民先生作品嘅最成熟顛峰時期，所以係屬於一套漢民fans絕對不能缺少收藏嘅作品，一套港漫fans不可缺看嘅作品！亦係在下個人推荐必須收藏嘅20套舊港漫作品之一！
而我嘅怪異集合訂本當然遠不止這幾本，所以又須要分多幾PART推出，因為合訂本每期成80頁故事太多，根本無法去逐本登內容，但我會選擇登齊晒封面、每期目錄、同埋書內所有故事版頭。
第01期----------投胎轉世、凶變
第02期----------壽衣、替身
第03期----------絕邪降、巧破絕邪降、奇異死亡
第04期----------迷離幽魂、隱形屋
第05期----------巫術、謎
第06期----------灰衣幽靈、邪人
第07期----------活屍
第08期----------鬼酒店、噩夢
第09期----------鬼語、假墓
第10期----------換頭、小亡魂
第11期----------復活、賊王
第12期----------無面人、勾魂攝魄
第13期----------無生命的人、慘叫
第14期----------地獄門、死亡玩笑
第15期----------鬼域、魔鏡
1-15期所有故事版頭
下期待續...........
同龍虎門齊名嘅李小龍都冇出咁多期合訂本，漢民老師呢招叫做靜雞雞，嚇死人^^。程兄，李小龍係我至愛，我好似未見你提及，李小龍你有冇齊套？
回覆刪除[版主回覆10/27/2011 18:33:45]根本係70-80年代，能够出到合訂本嘅，連龍虎門+小流氓都無出到200幾期！
小寶李小龍都係我至愛嚟，但李小龍齊套比龍虎門小流氓更難噃，我都仲差啲啦，留返遲啲post上嚟，不過遲吓就會先出返啲上官思危。
[香港居民回覆10/27/2011 17:36:20]haha, 我估佢橫版李小龍一定齊套!
你說得對怪異集合訂本 1-22期是十分值得收藏, 因為包括了漢民初期直版、直版怪談及漫畫王的作品，但有一點要了解，合訂本內的橫版作品應該不是真正橫版年代的作品，只是當年在漫畫王連載的故事, 如猛鬼屋、鬼洞等。如有錯誤，請指正。
回覆刪除[版主回覆10/27/2011 18:47:13]無錯，橫版漢民書係怪異集同合訂本之前嘅，我只係話怪異集+合訂本係佢作品最成熟嘅黃金時代，其中又包括咗幾個從未出過單行本嘅橫度作品，當然你都可以話唔算係橫版。
好多都未見過,非常珍貴.....^^
回覆刪除[版主回覆10/27/2011 23:48:39]珍貴就唔講得，反而我覺得合訂本前面期數較易見，後面期數反而少見啲。
係呀,真係正野,我只睇過鬼酒店,真係有錢都賣唔番.
回覆刪除期待下續~~~
不過呢,合訂本之後係咪比怪異集更早摺??
[版主回覆10/27/2011 23:50:39]怪異集有成570期，自然多出合訂本好多啦！
怪異集合訂本當年我都有期期買，不過理由同老兄你唔同，皆因當年呢本書有讀者來稿環節，小弟又係常客~~所以唔買唔安樂!!!!
回覆刪除[版主回覆10/27/2011 23:53:47]原來衛兄有份投稿，筆名係....？等我欣賞吓先。
Blog主, 我真係要係度比個"服"字你. 有咁多令身為港人的我好似回到80年代嘅收藏, 超懷舊! 雖然以前大多嘅作品冇宜家的精細, 因宜家多咗電腦扶助. 但從前的簡陋及粗糙亦都是這些收藏品巧妙之處.
回覆刪除[版主回覆10/28/2011 14:43:24]係，儲舊嘢好多時都係想緬懷追憶返當年嘅時光同情懷，呢啲係新嘢無法代替嘅！
亦好高興見到你啲超合金分享呀！
以前細個好驚睇怪異集，到大到咁上下，又只看中華英雄、龍記等打交書，不過印象中最驚嘅係睇佢畫日本人的故事，氣氛份外驚嚇。
回覆刪除[版主回覆10/28/2011 18:48:06]海虎係唔錯，當時算係幾突破！功夫亦係我近期睇過嘅少數作品之一，都OK，但故事只係改編別人的，與創作無關，我覺得龍少始終係畫返啲科幻嘢最好
[偉回覆10/28/2011 15:31:55]龍神時好鍾意佢，不過佢嘅虎頭蛇尾，我係好火滾嘅～～不過自火雲邪神外傳我又另眼相看了，聽聞功夫都叫好叫座，不過我未有再追佢嘅作品，但我最初識佢時喺係小強漫畫集度佢畫嗰啲Q版，特別鍾意異形^^
不過你問我最鍾意嘅漫畫，我就一定揀海虎，故事完整，有火，而且有結局（咁當然唔係舊龍、李小龍嗰啲「結局」喇！）
[版主回覆10/28/2011 14:49:07]可能係咁樣，所以打書一直係香港嘅主流書，而當中嘅代表又係馬仔同福龍......原來睇返我都未曾post過龍哥啲嘢？！龍哥咁多fans，遲啲要出多幾套佢啲作品咯！
大開眼界..................................
回覆刪除[版主回覆10/28/2011 18:50:24]多謝捧場，重有未完架。
都是童年回忆！一直很想买回。没有汉民之合订本以前会不买，但现时只要黑白都买，後期彩色的就兴趣不大。我怀疑合订本收录了部份《惊心动魄》，当中凡黄伟钊之作品，都没注明编绘者，不知是否故意。
回覆刪除[版主回覆10/29/2011 11:04:27]黄伟钊你都有兴趣咩？但好似合订本没他作品吧？
我估你該係我見擁有漢民最多嘅人，係唔係?
回覆刪除[版主回覆10/29/2011 11:12:41]哈哈，咁都比你知道？我計下都該有近600本，唔知算唔算最多？當然包括啲重復嘅，因為我都仲意keep多兩套。
單看封面都已是一種享受!
回覆刪除[版主回覆10/30/2011 18:45:56]無錯，呢啲就係舊嘢嘅吸引力啦！
好詳盡，絕邪降無出過單行，但以畫功來講，應是怪異集時期的作品；相反凶變及壽衣應再早一點了。
回覆刪除[版主回覆11/07/2011 13:12:03]絕邪降同壽衣都好似無出過單行本。無錯！凶變同壽衣該比絕邪降早期！
請問你係文中提及必儲的20套是哪些?
回覆刪除[版主回覆07/15/2012 10:12:17]李小龍、小流氓龍虎門、怪異集、醉拳、如來神掌、漢民橫版鬼書、老夫子、中華英雄、刀劍笑、玉郎漫畫、漫畫王、段段情濃、壽星仔、小强漫畫集小强畫集、超神z、戇男故事、怪異集合訂本、百份百感覺、海虎123、天下画集，純個人喜好，因大部份尚未在本blog介紹，入20原因到時再詳述