HALLOWEEN萬聖節，漢民。夜半回魂

明天就係哈囉喂這個西方節日扮鬼扮馬嘅日子，若睇埋漢民這本"夜半回魂"就更應晒節
因為本書故事發生在西方，人物全部都係西人，故事亦係講扮鬼嚇人.......
此書除畫功好之外，故事"劇情"緊凑縣疑，結局出人意表，加上漢民嘅編排同演譯，真正做到了"恐怖效果"出來，以咁多年前嘅舊書來計，無論在畫面同劇情上有咁高嘅水準，可以說己經超越晒當年同類鬼故書嘅級數！

本書故事內容係講男主角前妻患絕症而死，佢因而承受咗前妻大筆遺產，但他沒守承諾又再娶第二任妻子，於是巨宅內怪事頻生，己死去嘅前妻好似己變成厲鬼，，纏擾着不守諾嘅丈夫，最終男主角被嚇死.....
原來當他追求迎娶第一任妻子開始，就己經踏入了一個死亡騙局，一切一切是一個謀財害命嘅致命佈局.......

漢民。地獄門

就快到西方嘅哈囉喂萬聖節，每到這個時間，一定揾返漢民啲書先至會最應節！因為漢民除了畫鬼故之外，可以經常性成本書都以西方外國人做故事嘅香港漫畫家，也只有漢民一個，
可以講，從前到現在都冇一個香港漫畫家畫西方人可以神似過漢民、好過漢民，亦無任何一個本地漫畫家有咁多本作品內文係可以全書從頭到尾均以西人為主嘅漫畫。
所以鬼故+西人，能够符合晒萬聖節元素嘅香港漫畫書，就一定是漢民嘅作品囉
漢民怪談系列有分全彩色及黑白色內文兩種，部份漢民怪談是全彩色，部份是黑白色，地獄門是漢民怪談系列22本其中一本作品，是一本全彩色鬼故作品，而漢民怪談全彩色鬼故亦是一改鬼故以黑白色為主嘅傳統，所以可謂是創先河！

黑道大哥遭到被他害死嘅兄弟變成厲鬼尋仇，最後將他引入地獄之門.......

戇男、龐重輝。戇男戀曲

在下本身好鍾意戇男啲公仔，特別係佢一些早期作品，這本"戇男戀曲"就搜羅輯錄咗80年代戇男嘅一些作品，
全書共24個愛情悲歡離合短篇作品，24段故事大部份以戇男為主角，更有些早期是以戇男原名"鄧浩垣"為筆名嘅作品，加上有幾個作品是龐重輝有份協力繒畫，全書有成130多頁，所以鍾意睇戇男嘅朋友，這本書就啱晒睇

周勝。水滸傳承

若說這套"水滸傳承"是周勝最有heart、最有誠意嘅作品，一點不為過！
因為可以從這套書看得出，周勝同其組員用足心機去編寫制作。故事是寫水滸108個梁山泊人物事蹟，原本計劃是每個梁山人物佔數期故事，如此計落108個人物也該有數百期書，但當然最後這套書只能寫到20多期，也是因為銷量問題了。
水滸傳承是周勝第7套作品，也是一套佢最值得推荐嘅作品，1994年出版，第1-3輯共23期完是普通港漫版，第4輯1-5期完，是為精裝本，內文改為黑白，月刋形式出版，而好多朋友，只有前面23期，因為之後嘅5本精裝本，共歷時8個多月才出齊，所以在收集上是有一定難度的，而真正大全套該是23本簿裝+5本精裝+1本水滸外傳特刋！


有啲朋友認為周勝畫風有啲類近邱福龍，同樣都係筆法蒼勁，咁就大家一齊來欣賞下佢這28本靚靚嘅封面及內文，同邱福龍比較一下似唔似

狄克。火神劍

此套乃狄克第一套個人單行本，狄克第一套武俠漫畫亦係唯一一套武俠作品，1984年1月出版，2期完。
故事都係講剷除魔教為師報仇，當然像這類書，我們無謂去計較佢嘅內容劇情，只係睇返回味返一種漫畫嘅歷史己足够。
稍後狄克被徵召在玉郎漫畫內畫"情若無花不結果"大受歡迎，並成為80年代愛情漫畫嘅代表者，編繪咗數以百本嘅愛情漫畫作品，而佢這套最早期嘅武俠作品卻成為佢唯一"另類"嘅題材！

張萬有、牛佬、崔成安。巨龍列傳(末代英雄傳)

這套1997年出版嘅巨龍列傳，台譯"末代英雄傳"，己差不多係張萬有最後嘅幾套作品之一了，這套作品主筆除張萬有之外，尚集合咗牛佬文啟明及負責勾頭同做專欄插圖嘅崔成安，所以算係强勁陣容，加埋這套係張萬有同崔成安嘅最後作品之一，所以這套書是必然值得收藏嘅！
故事係講清末日本入侵為主綫，啱晒近期中日海島情緒啦！不過書內角色有陳真、杜月笙、馬永貞、袁世凱、大刀王五、張保仔等等，全部變晒做一流超級高手，讀者接唔接受到就見仁見智了，巨龍列傳，港版9期完，台版三合一厚裝，共3期完。

里見 桂作品part 1

里見桂首套作品發表於1979年，然後在80年代初期開始一路出過唔少作品，當中以科幻、縣疑、神怪較為擅長，雖然他非好出名，香港新一代讀者亦未必知道或睇過佢啲書，
佢啲作品一向好有"戲味"、故事性好强、畫功甚佳、平均作品水準好穩定有保証，所以一直以來我旦凡見到佢啲作品都會收藏，每一本亦都會睇晒因為像這樣好嘅故事、題材，絕佳嘅劇情，對唔住，在港漫之中絕對找不到的！