大衛兒、區兆霖。戀愛時代

大衛兒係我好鍾意嘅主筆，手畫絕對有天份，可惜作品就少咗啲。但要儲齊佢的作品，真係唔係咁容易
呢套由鄺氏上官小寶出品、戇男策劃，加大衛兒、區兆霖嘅"戀愛時代"，絕對係一套上佳嘅愛情故事漫畫，我這裹只得1-4期，真係從未見過之後嘅期數，但應該還有囉，麻煩有冇人知我還欠多少期呢？

狄克、葉明發。情若無花不結果LOVERS

80年代初，狄克憑在"玉郎漫畫"內連載嘅"情若無花不結果"一嗚驚人，從此衍生出好多愛情故事漫畫。
這套3三嘅"情若無花不結果LOVERS"係狄克+葉明發愛情故事漫畫短篇嘅結集本，又可以稱為"豪華版"，這三本比普通連環圖SIZE大好多，厚度成125頁，價錢亦貴一倍有多，而這種版本嘅漫畫喺市場絕無僅有，豪華大本式嘅包裝，可以作為禮品贈送都OK，不過內頁故事均為黑白印制，只有少少彩色內文。但有狄克、葉明發就係賣點

邱褔龍、李志清。鐵將縱橫及海報

鐵將縱橫係邱褔龍第一本個人作品，1989年8月出版，即是與"天下畫集"同期，其時"玉郎漫畫"己經出到第200期....
當時一套漫畫真係閒閒哋都可以超過100期，偏偏龍少這套第一部個作品、這麼讓人期待這麽勁嘅打書，赤殺王、雷橫、九天雷祖、滅絕王、鐵縱橫、武林三祖這些咁勁嘅角色同人物設定、咁勁嘅打書，居然只捱到區區40多期，真係跌破所有內行外行人眼鏡卦？所以常說世事無絕對！
以龍少嘅畫功，鐵將縱橫與天下畫集幾乎同時出版，20幾年後馬仔依然仲畫緊本天下，龍少卻己畫咗好多套唔同嘅作品，現在又返轉畫返"鐵將縱橫"，今日回看兩人雖同為受歡迎同等級數嘅漫畫家，但實質際遇卻是迥然迴異！
不過從讀者嘅角度，20多年間邱褔龍可以畫到多套唔同嘅作品，相對於馬仔只得區區嘅一套"天下畫集"-----"風雲"比大家，龍迷都應該滿足了！
這次趁龍少新著"鐵將縱橫"推出前，重温一下佢套舊嘅"鐵將"，相信舊讀者都會和我一樣，別有一番感受！


這套"鐵將縱橫"全套46本完，1至17期主筆邱福龍，18-46期主筆由李志清接手。

曹志豪、嚴志超、温浩賢。情双周

曹志豪這個不錯嘅主筆自1985年入行，而佢最先嘅作品係刋載於怪異集、猛鬼冤魂，而情双周則是曹君個人單行本首發之處....
這套"情双周"是當年好受爭議性嘅漫畫刋物，好多朋友仔學生仔都唔敢買返屋企、或者只敢偷偷哋買嚟睇，
原因當其時"色情漫畫"泛濫，遭社會大力反彈，當年油尖旺更發起擺賣此類漫畫事件！
情双周就是在這段時期出現，可以說是一套草草結束甚失敗嘅作品，失敗在於佢定位混淆，封面就似足"色情漫畫"格局，內容就係愛情小品故事，導致兩邊不討好，取悅、吸引唔到原本特定嘅讀者羣，至曹志豪接手，作品目標是洗脫"有味"漫畫形像，但改革為時太晚！最終要停刋才能够與"色情漫畫"劃清界線、才能擺脫這套書在讀者心中"有味"漫畫嘅印像！
不過好嘅主筆不愁被埋沒的，七種武器、創世神兵、冥獸酷殺行、黑龍、城市驚世錄、神兵玄奇F二戰篇.....曹志豪一路至今都有作品出！
情双周全套共30本，係94年回歸前嘅出品了，1-17期温浩賢畫(其中第11期由嚴志超畫)，18-30期由曹志豪編畫。

情双周全套30本封面

情人節，愛的故事漫畫結集(香港漫畫雜part 9)

又到情人節，喺度登返啲愛情故事漫畫應下節先，這些曾經出現過嘅港漫愛情漫畫，大家有冇印像見過呢？今次唔講咁多，睇圖去片啦！大家情人節快樂

漢民、周勝、謝志榮。麗人

"麗人"嘅主力主筆，原本係漢民，因為漢民開頭幾期嚐試過畫"怪異集"之餘，兼多一本"麗人"，但後來佢發覺不能同時兼顧兩本書而保持"稿質"，於是就放棄咗寫"麗人"！這點在他的專欄同信箱都有提及。
這是很值得學習的，亦唔係個個做到，因為既然明知寫稿速度唔快，與其影响兩本稿質、水準，不如賺少啲放棄一本。
其實漢民喺整個橫版至直版書時代，共畫了幾百本作品之中，幾乎全部都係以畫神、鬼、科幻為主！屬於其他書種嘅，就只有橫版嘅"小姐"1、2期，豪放女1、2期，同埋這套"麗人"內嘅4段連載稿，所以"麗人"內嘅漢民愛情故事是否屬難得、少見而值得收藏嘅作品，大家衡量吧！

黄偉建、李志清、崔成安 。麗人

"麗人"，全套有35本，80年代中一套經典嘅綜合愛情漫畫書，係屬於超超難集齊嘅漫畫書之一(因為我尚未見過有任何朋友集齊一套者)，總結原因；1當年並非大路熱門書，更非武打、鬼書嘅熱門題材種類，故雖有强大主筆陣容都被好多讀者忽略，2太多不同嘅主筆參與令個別fans拆散收藏個別主筆，3銷量不太高至令印量不太多，加埋每期有不同明星專訪，至另增加一批明星fans收集個別期數，這些都成為難以集齊成套嘅原因。
但"麗人"係集合咗當年最强嘅主筆陣容去編寫屬於佢哋另類題材、絕無僅有嘅"愛情漫畫"，這些主筆好多都係長期畫鬼書打書同江湖書，所以喺"麗人"內佢哋畫嘅愛情故事漫畫題材，對佢哋嚟講就等於罕有！
漢民、司徒劍僑、永仁、黄偉釗、大衛兒、謝志榮、馮志明、許景琛、嚴志超、黄偉建、葉慶全、黎智昌、徐大寶、温浩賢、周勝、鄺彬强、陳偉文、狄克、崔成安、陳志祥、李志清、北京陳、黄國興、西華....咁勁嘅主筆陣容嘅綜合愛情故事漫畫，除咗呢套之外，都揾唔到另一套！
因為無可能逐個登晒所有啲主筆作品，所以今次我又換個另外方式去介紹下這套書......就係從中挑選約十個具代表性知名度嘅主筆，以分開每次兩三個主筆嘅作品去集中介紹，今次除了封面之外，就首選介紹下靈幻小姐、俠骨神鑑主筆黄偉建(建君)、"三國誌"主筆李志清同崔成安喺"麗人"內嘅作品。
靈幻小姐、俠骨神鑑主筆黄偉建(建君)喺"麗人"這套書內有8篇屬於佢嘅故事，而第三期刋載嘅"唇印"就係黄偉建(建君)個人嘅第一套發表嘅作品，所以"麗人"對佢嚟講意義重大！大家就一切來欣賞下黄偉建幾篇初出道作品啦而李志清在全套"麗人"內只有"漣漪"一篇，刋載於"麗人"第30期，崔成安則有"'富貴再迫人"，刋載於"麗人"第28期。

麗人1-35期全套封面




麗人特色係每期邀請當紅女明星做專訪，第一期就請李麗珍做嘉賓，當年珍姐係此書總經理祁生女友，自然大力摧谷宣傳啦

年少無知、暖愛故事----陳順康作品集

陳順康，1986年入行，先做戇男漫畫助理，有份做戇男故事、狄克戀曲封面，擅長水彩作品，特別係"淡彩"，我就係最鍾意佢啲淡彩畫喇！
這本95年出版嘅"陳順康作品集"係佢第一本個人作品，收錄咗佢三個故事，包括"年少無知"、"暖愛故事"、"拿撒勒末日傳說"！
老實講，呢本主筆唔係乜嘢畫壇猛人作品，無乜大知名度、本書又唔係幾十年前古董，亦都唔難揾到這本書、更加唔係什麼天價罕貴書種，但係我都專為這一本書單單寫一篇，因為係我個BLOG，係唔會計較呢啲嘢，不論新舊貴平冷門熱門港漫日漫男主筆女主筆嘅書，只要認為係值得寫值得介紹的，就統統會一視同仁咁介紹下，這本便是一個例子，因為主筆嘅誠意同水彩畫都係我好欣賞嘅！
呢本書唔好當係公仔書咁睇，當係一本個人水彩畫集咁欣賞會比較好。唔講咁多，貼多幾幅圖....

何志文、林海峯、林祥焜。FEELING

1999年出版嘅FEELING，係一套好少有以愛情漫畫為主題嘅綜合愛情漫畫，以精裝版形式推出，好類似"百份百感覺"，而事實上這套綜合漫畫，原本都係會連載劉雲傑作品，連第一期封面都係劉雲傑畫，只係佢實在未能抽到時間畫啫！
不過這套之內都還有志文作品，其他主筆還有林海峯、梁瑋豪、蔡麗菁、林祥焜、JASON SIU...
這套書有9期，我還還欠一本第9期。

天下女主筆：雪晴作品part 1

雪晴係香港目前最活躍多產嘅女主筆，佢啲作品最初喺yes雜誌內連載，後來開始出單行本，出咗幾多本作品，就真無統計，不過肯定係唔少！
我哋睇開港漫嘅男讀者，好少去買啲女主筆嘅書睇，不過就我觀察所得，可以講佢嘅作品每次出完無幾耐就斷晒市，算係幾好賣，你買一本舊龍虎門、天下，可能仲容易揾過一本雪睛作品！証明佢啲書，係有唔少女讀者keep住架！
佢後來又成為天下嘅獨立女主筆之一，不過係完全無馬仔風格兼完全無受佢影响嘅獨立主筆！
至於佢啲畫功同公仔；只能够講：佢啲公仔畫得靚過唔少其他新舊主筆架！而對我黎講，主筆畫得有誠意、公仔清新幾靚就OK，大家睇打書江湖書多，剩餘嘅少少不仿支持下本地嘅女主筆作品！

以下介紹她其中一部份作品：

盲點湖(2003年出版)