我的漫畫時代: 8月 2011

2011年8月30日星期二

牛佬.文啓明-正牌小密探---大戰摧花手

呢本8角子橫度書牛佬作品聽講都好少有，而我至多都只係網上僅見過封面咁大把，所以今次先摷出來介紹下，呢本嘢雖然係第1期，不過係獨立完整嘅一期完故事，係牛佬最早期嘅作品之一，內容講乜？睇書名"大戰摧花手"清楚晒啦！

2011年8月27日星期六

黄偉建-靈幻小姐

靈幻小姐，早期連載於"玉郎漫畫"，因為受歡迎，後來獨立出書，現在香港己無此類題材，要看唯有看回這些舊書。靈幻小姐，88年出版，全套20期完。

靈幻小姐第一期至二十期封面

2011年8月24日星期三

司徒劍僑-幻影迷離

幻影迷離就完全係司徒劍僑風格，內容有科幻、超能力、怪異，全套該有六本，每本獨立故事；

第一期---------預兆
第二期---------復仇超能力
第三期---------超次元傳說
第四期---------誰負了誰
第五期---------恕難從命
第六期---------狼童(第6期市場未見，狼童其後連載於88年出版嘅"妖魔鬼怪"書內)

封面

2011年8月21日星期日

唔知大家重記唔記得好耐之前有部好受歡迎電視卡通叫"南瓜酒"呢？講一個身材豐滿高挑嘅少女同個子短細男主角嘅輕鬆愛情小品，這套卡通片當時都牽起過一陣熱潮架！

L&S 南瓜酒第一章首刋於1981年，都成30年歷史啦，此套書至今未有正式出過香港中文版，而海豹叢書就係84食住電視個勢出第一期，全套共32期，台灣"大然"版後來就出過全套，係香港都有得賣，不過好快就斷市，正式手快有！

海豹叢書1-32期封面

2011年8月18日星期四

原哲夫-北斗之拳

香港曾經係亞洲第二漫畫市場，日本就係世界第一，既然睇港漫，又點能唔睇作為漫畫王國嘅日漫呢？
好多日本漫畫家作品都好喜歡，但係當中手塚治虫、永安巧、安達充、安顏良和、寺澤武一、楳圖一雄、岡崎繼央、千葉徹彌、桂正和、藤子不二雄、大和和紀、高橋留美子、太田慶文、美樹本晴彥、庄司陽子、五十嵐優美子、里見桂、原哲夫、池上遼一、浦沢直樹、北条司等等嘅所有作品同埋畫集，都係我日漫嘅主要收藏對像。
而今次嘅北斗之拳，係日漫經典之一，我認為係每一個睇漫畫嘅人都必看嘅作品之一。

係還未有版權嘅簿裝書時期，我儲齊咗一套53期加一本特別短篇"青烏"版嘅北斗之拳，之後又儲咗一套16本嘅台灣"新少年版"，這套與日文豪華版大致相同，够厚又印制精美，所以我至仲意這個版！再之後又儲多套由"玉皇朝"出嘅正裝中文版全套27期，至此我這個"北斗之拳"大全套就完成啦

"青烏"版北斗之拳，全套53期加一短篇封面

2011年8月14日星期日

黃玉郎、張萬有-龍虎門新傳

我只喜歡黃生由橫版龍虎門時期至白蓮教時期內佢嘅所有作品，也包括咗初期嘅如來神掌同醉拳在內，我認為這段時期係佢嘅顛峯！
黄玉郎嘅公仔，人體比例同公仔嘅身體動作、變化同運用，係全行至高，無人能及。所以佢畫武打動作漫畫就係至強，招式至靈活、動感至强至正！所以佢這段時期嘅作品就係我收藏嘅目標。
而係橫版公仔書嘅年代，大量書種都係出得幾期就無故失踪或摺埋，可以出到幾十期書嘅，真係屈指可數，龍虎門新傳就係其中之一啦。龍虎門新傳唔係全部出自黃玉郎手筆，期後都係由張萬有接手，但係唔詳細分啦，我都將這套書歸納為黃玉郎，全因為佢個名、佢個"龍虎門"招牌，龍虎門新傳才得以畫到幾十期。

龍虎門新傳全套1-46期完

啲相映到麻麻，不過今次主要係寫篇嘢，介紹套書反而是其次。

2011年8月11日星期四

狄克-情若無花不結果

狄克既經典作，唔係火神劍、唔係鬼域、更加唔係愛殺，而係"情若無花不結果"，呢套之後，狄克就成為校園、愛情小品嘅標誌，之後嘅作品"狄克戀曲"214期、"愛的故事"128期，個人作品能够出到咁長期數，至今都唔係咁多主筆可以做到，狄克嘅校園、愛情小品就係這類題材嘅經典！
情若無花不結果全套107期完，狄克只負責至42期，之後這書內作品，全為香港一線主筆嘅短篇集，43-107期，輯錄近180個故事，主筆陣容强到絕無僅有，大衛兒、馮志明、葉明發、崔成安、清兒、李高、黃偉健、梁家偉、永仁、袁家寶、嚴志超、胡紹權、司徒劍橋、廖福成等等輪流出場，作品亦有大量科幻、鬼怪、靈異、古代等題材，所以"情若無花不結果"絕對係一套香港綜合漫畫類嘅經典！

狄克-情若無花不結果，全套107期封面

1-10期封面