手塚治虫大全集序章之：雷電俠

怪醫秦博士、小飛俠、藍寶石王子、三眼神童、小白獅、海王子、火之烏、佛祖傳、阿道夫......天文、地理、醫學、神怪、傳記、動物、童話、傳說、戰爭、科幻、縣疑、歷史、古代現代未來....手塚治虫先生筆下嘅題材、人物涉獵之多之廣，相信全世界冇一個漫畫家可以及得上他，睇漫畫或者儲漫畫者錯過咗手塚治虫嘅作品，絕對係一種缺失同遺憾！未睇過手塚先生嘅漫畫，點叫做睇過漫畫呀
手塚先生一生繪制近400本繪本，若以平均200頁一本計，都相當於2500本港漫囉，但都未止於這個數，佢生前畫落嘅手稿同未發表過嘅作品到而家仲陸續出版中，所以肯定無乜漫畫家同主筆可以比得上佢！一個一生到死個日都仲畫緊漫畫嘅人、一個被漫畫之國尊稱為"漫畫之神"嘅人，事問我哋從小就睇開漫畫嘅，又點能唔去接觸、唔去睇佢啲作品呢？
一套近400本咁精彩豐富嘅大全集，我哋睇漫畫同收藏漫畫嘅，點可以唔預些地方收藏手塚嘅漫畫呀？
喺香港都己經好幸福，因為手塚啲作品絕大部份都己出晒中文版，而今次係第一次在本blog介紹手塚啲書、又係以少見為題，所以就先介紹這本從未在香港出版過中文版嘅"雷電俠"；
這本一期完嘅"雷電俠"，全書共有五章210多頁，出版日期約為60年代尾至70年代初出版，而這本是再版書，但都己經係1983年出版喇！作者將自己代入書中成為主角之一，也是作為連貫整個故事同作為說故事的人，以自己代入書中角色未知是否為漫畫創作先河？全書本身畫有大量不同類型怪獸、也有大量怪獸混戰同打鬥場面，咁精彩嘅手塚舊作，真奇怪為何從未出過香港中文版呢
今次係第一次在這裏貼手塚治虫嘅作品，這篇只是作為序章，往後就希望可以係度介紹、分享晒手塚先生嘅所有作品！

雷電俠

上官小强的漫畫世界之：王先生兩仔爺系列

港漫之中，武打書黃玉郎上官小寶啲作品己經上咗神枱，成為經典！鬼故作品就首推漢民，本本漢民橫版書都成天價，鬼故大師當之無愧！
而搞笑漫畫方面，上官小强就係當中嘅代表！大家都知佢嘅代表作係"壽星仔"，都係幾套經典嘅港漫之一！
但大家又有冇發覺這"壽星仔"原創者上官小強喺畫"壽星仔"之前，其實喺2毫子時代嘅書，己經創造咗一個非常有趣味嘅漫畫世界？這個多元化、體驗社會各階層、唔同系列嘅獨特漫畫世界，內裏參與嘅角色同人物眾多、各式其式，包羅萬有！
將佢創造嘅唔同人物、角色、故事分類，就會發現一個個有趣嘅上官小强漫畫世界"系列"接近20個，例如：野先生與濟公系列、小流氓系列、小如來系列、三小怪系列、獨眼豹系列........
故上官小強嘅二毫子書，除了較少見之外，更可謂是一個非常有趣味嘅收藏，所以大家喺收藏2毫子書仔嘅同時，又有冇着重去分門別類？有冇着重以"系列"式去收集齊呢？還是只停留在隨意式收集嘅階段呢？而集齊每個成套嘅系列過程，都係唔容易嘅收集過程，因為每一本書都己經一早絕版、少見，故要集齊一個系列嘅難度會好大！
以今次為例子；我post出嚟嘅係1 set七本"王先生兩仔爺系列"，其他"系列"稍後有機會都會陸繼post出！"王先生兩仔爺"的王先生造型類似"老夫子"，內容以搞笑、諷刺時弊為題材.....儲開上官小強啲書或搞笑漫畫嘅朋友，有機會就千祈唔好放過這些比"壽星仔"更早期更得意嘅上官小强書仔呀


上官小強(凌霄)：王先生兩仔爺系列

漢民。小姐

漢民嘅橫版書，本本己是天價，再以發行量、罕有程度、價值上，本身己經亳無異議可以稱得上是"橫版書皇"！
而自橫版時代到90年代，漢民先生畫過作品近350本，其中非鬼故神怪類嘅就只有區區幾本，這套橫版小姐1、2更加係漢民72本橫版書中唯一两本非鬼書類作品，尤其是第二期漢民以"韋鴻"做筆名更加係得這一本，
以我經驗所得，這本第2期以"韋鴻"做筆名嘅橫版漢民書，更加己經比大部份嘅漢民橫版矜貴，而是實上，這本第二期我亦只在以前一位舊blog友嘅blog入面見齊2本一次、喺我朋友嘅珍藏中見過一本第2期咁大把，故再加上上述種種原因，這本就絕對配得上"罕"這一個字。
講返本書，兩本"小姐"均是獨立故事，但題材都係大概講風月塲所"小姐"嘅辛酸事，第二期更加係講個主角"靚女"小姐原來係個變性人

馮志明。ROCKY洛奇

今期介紹這套馮志明80年代一套三本嘅"洛奇"，罕有程度應該仲高過好多橫版書架，相信有齊三本嘅人會極少，原因之一係這套單行本係輯錄完整連載於"漫畫王"內嘅洛奇故事，發行量極少！兼且每一期都不定時出版，例如第一本與第二本相隔成個多月才出，另由於第一期己經係一本完嘅完整故事，根本無預告過有第二期出版，
故好多朋友就算有，都係得返第一期！不定期、不定時、沒有預告、出版發行量極少，相對就形成咗罕有程度極高！更難得係本本都保存得幾靚仔
講返套書嘅內容同質素；當時大熱流行嘅洛奇故事，加埋馮志明手畫功、最勁正還是第二集畫嘅"功夫皇"李小龍，真係超勁正我認為係當年其中一套最突出精彩嘅作品！

這是元祖漫画王

今次介紹這本屬於二亳子時期嘅"漫画王"，是勁罕見少有漫畫！乃是真真正正嘅元祖級"漫画王"，亦係80年代玉郎集團出版嘅"漫畫王"書名來源！
皆因這元祖級系列嘅"漫画王"集內，曾經有唔少"黃玄生"即黃玉郎嘅作品，即係引証咗黃生於80年代由玉郎集團出版嘅"漫畫王"取名乃百份百源自這套元祖"漫画王"！
其實我本身唔止得這一本，還有幾本摷唔到出嚟，而這本己經係第16期，緣因為近日在網上見到有人拎這套書嘅第9期出嚟拍賣，當中有黃生作品，標價成4k，所以我都拎返本第16期post出嚟寫下....
這套書雖然單單一本己經貴到離譜，但因為一來够耐歷史、二來勁少有，同埋這套書係真真正正堪稱得上為漫畫之王架！因為這套書每一本都超特厚有成300頁，莫說在當年，即使今天亦難有這麽厚度嘅港漫！
此套書每本有8個完整故事，所以每一期每一本都可以完整獨立睇，而我這本第16期內嘅8段故事，主筆係邊個完全沒有註明、沒有資料，所以睇怕真係要揾的勁資深嘅收藏家或讀者，先至可以分辨得出咯！
以下我特將這本書內嘅8段故事內頁逐段post出嚟，等各位C兄睇下可唔可以認得出一個半個作者係邊個.......

上官小強。和尚仔趣史

上官小強有N多作品，從2毫細書到大書，從橫版到直版，幾乎從60年代末到90年代中都可以揾到佢嘅作品，佢啲公仔靠身體語言加動作去表達嘅搞笑風格，實在獨樹一幟，別無分號！
而佢最經典嘅"壽星仔"一畫超過500期，壽星仔己經成為ICON！係香港惹笑漫畫上，真係最突出嘅一個，成就也只有老夫子王澤可比之！
而佢呢套和尚仔趣史，全套得8本，出第一期嘅時候，剛好"壽星仔"出到20多期，所以這套"和尚仔趣史"幾乎與"壽星仔"同時期！以"和尚仔"做主角，但亦加入了壽星仔等角色，故亦可視為"壽星仔"外傳！
這套書第1、2期售$1，第3期開始加到$1.5，每冊頁數亦加至50頁。

另一位BLOG友嘅珍藏分享

今次post出嘅係另一位blog友ERIC兄嘅部份收藏，blog友ERIC兄與我嗰位朋友唔同，佢係自己親自影相SEND過嚟比我，我又順便POST啲相片出嚟大家分享下
ERIC兄儲書嘅口味上與我個朋友又有少少分別，可以從他們的收藏品中分辨出來的，
ERIC兄啲書唔算太罕有，但啲書都係屬少見一類，而且現時每一本都好難揾到啦，佢可以收集到咁多少見嘅絕版書一齊登出嚟，兼且只係佢其中一部份，都好唔簡單架，呢度登出嚟啲書，可以講我就算加埋個朋友嘅藏書名單內，九成都係無架，因為我以前係完全唔儲啲趣怪漫畫同黃興豬啲嘢囉



上圖：幾本創刋號，好犀利，但最罕見係右上角嗰本"黄大仙"第1期，勁！

霍絲荻尼。原智惠子

點解香港依家無晒啲愛情故事漫畫？無晒市塲？我諗都好簡單可以揾到答案，因為港漫愛情故事，不如睇日漫，日漫愛情故事永遠較港漫煞食之處，就係故事細緻、有故事性、有感動讀者嘅元素，有感情得多！加埋服飾華麗、時尚、順潮流，所以港漫依家除咗吸引到淨喜歡睇打書嘅一小部份讀者之外，其他題材根本唔够"砌"
這套原智惠子嘅"霍絲荻尼"就有齊晒以上日漫愛情故事嘅元素，這套書沒有其他中文版，只有海豹版，海豹版都己經係1983年出版，日文版應該係70年代出版咯，而相信這裏無乜男同學會記得或keep到呢套書，但我記得這套書當年是極受歡迎，每期一出即售完，極速絕版！
我諗因為係此書畫風與另一套經典漫畫"小甜甜"極相近，啲公仔討好兼可愛到爆燈，加埋有晒華麗嘅服裝、場景，比五十嵐優美子嘅"小甜甜"更有過之，喺日本亦同屬相當經典嘅少女漫畫！

庄司陽子作品集part 1。生徒諸君！

文化傳信、日本原版"生徒諸君！"，台灣版譯名"俏女郎"，海豹叢書則叫"學生公主"，
庄司陽子1977年創作嘅"生徒諸君！"係好經典嘅校園愛情小品漫畫，係有一套好完整故事架構嘅輕鬆愛情漫畫，
描寫校園嘅生活趣事、妙事、愛情、友情、師生、家庭、父母、兄弟，一套充滿生命、感動人心嘅作品，主角從學生、少年一路描寫到成年，作品內嘅情節或許都有你同我曾經經歷過嘅學校生活小節同際遇，都有共嗚！
全套原裝有成24本，以每本書有200頁計，即約等於港漫薄裝書近150期了！在當時日漫之中己屬大長篇，全書由1977年起畫至1985才完結，這非要極受歡迎嘅漫畫才能做到！另一個趣味就是書中的主角們一路成長，同時也見証主筆庒司陽子嘅畫技一路成熟！
故事描寫以男女主角在校園相遇結識為全書開始，一起渡過學生、少年嘅學校生活，經歷咗好多趣事、鎖事、當中夾雜住主角們各種生活體驗、經歷，愛情親情同生活細節，故事以男女主角最後又回到母校，以教師嘅身份，繼續在學校春風化雨，作為全書嘅結局！
如此一類完整故事架構嘅大長篇漫畫，係同類港漫題材中絕對睇唔到，更加揾唔到任何一套同類書可比！最正嘅係，一套咁好睇嘅漫書，依家喺好多二手舊書店都仲可以買到全套，仲係半價添，真係超晒值啦
此套書在1978年己經榮獲第二屆講談祉漫畫大獎，其後被翻拍成無數嘅動畫版同電視連續劇！

我有港版同台版二套，港版依足原裝版，全套有24本，台版全套則有27本，附有生徒諸君！外傳

港版全封面