上官小強的漫畫世界：超人系列

幾十年前，冇乜版權法，抄襲成風，當時好多港漫畫家，都畫過以"超人"類為題材嘅漫畫書，
當中比較出名嘅有黃玉郎、東方傭等，而在下獨愛嘅上官小强亦有畫這種題材嘅書種，佢當時更於不同時期以不同筆名去繪畫以超人為題材嘅公仔畫，從2毫書一路到5毫子再到8毫子書，不同時期都出過超人書！



這本小强嘅超人之轟天大惡魔係比較少有嘅8毫子大裝書，即係接近現時市面上港漫書嘅size

邱福龍。超人TIGA

這是香港首套由原版超人正式授權，玉皇朝、邱福龍繪畫嘅超人廸加，這套書係超人迷福龍迷必有嘅正書！
呢套雖然只係1998年屬較近年嘅出版作品，唔算太耐歷史，但我肯定這套書收藏價值極之高！
依家邱福龍畫嘅都以武打為主，但這必只是因市場銷路來決定嘅題材方向，實則龍少畫以龍神、超人、小魔神這類題材才是他最佳出品！
而創刋所附送DIE-CUT紀念VCD，紀錄咗福龍"超人TIGA"漫畫製作過程、專訪等，亦係全港漫畫首創。

冷門二毫子書仔part 3

今期又登返幾本70年代細書，呢類咁多年前嘅書仔，唔須計較主筆嘅名氣及畫功，也無須讚彈故事內容，因咁耐歷史嘅書，本本都己經入於冷門，想揾返本相重嘅都好難，
而這些書嘅作者同主筆亦都好難再深入考究了，但就可以作為一個歷史見証同產物，見証咗自60、70年代起開始蓬勃發展及題材種類多樣化嘅公仔書時代開始.....



黃金城。飛女王

漢民、馮志明。綜合漫畫東方之豬

若數返3、40年前嘅綜合漫畫，絕對唔太多，因為當年綜合漫畫好難有生存空間(當然現今嘅情况就更差)，長壽嘅綜合漫畫更加近乎零，大家熟識嘅臭香港、金漫畫、73漫畫等都至多得十零期貨仔，
到了80年代，才有最長壽嘅"玉郎漫畫"出現，而70年代當中綜合漫畫之中較少見嘅冷品便要數到這本"東方之豬"了。
這本70年代8毫子裝綜合漫畫，主筆眾多，乃包括江海濤、林步陞、高麗心、小依人(漢民)、梁天尺、馮志明、晚霞、念曾等等....當中以漢民及江海濤所佔全書比例最多，可謂本書主筆中嘅主筆！
而漢民作品出現於一本綜合漫畫亦不多常見，漢民就用咗"小依人"及"上官夢妮"两個筆名在本書出現，用"小依人"為筆名嘅書己不多，而知道漢民另一個筆名"上官夢妮"嘅更加少之又少吧！再加上馮志明最早登場嘅諷刺時弊作品，形成這本書好有紀念價價！

時代漫畫

80年代出過一些8開本週刋漫畫，如漫畫周刋、2001、漫畫王等等，不過亦有一些好"短期"嘅8開本漫畫出現過，這類漫畫書分分鐘一不留意，便己錯過，
"時代漫畫"便是其中一本，而比較嘅這本"時代漫畫"裏面所連載嘅漫畫故事，港、日各佔一半，其實書內所連載嘅故事同內容都唔錯，算是幾吸引，但出咗一期之後，唔再見到有第二期，比較可惜....

上官小强的漫畫世界之：濟公系列

上官小强在未出成名作"壽星仔"之前，一路畫下咗極多嘅細書，所引用嘅筆名，亦可算是最多嘅一個漫畫家之一，計有陳少强、凌霄、狄龍、陳小强、陳少林等等...
而作品中除了有佢大量創作出來嘅人物之外，還有一些好熟識嘅抄作角色，超人、獨臂小刀王、十兄弟、小流氓、蝙蝠俠、黃飛鴻、小魔神、孫悟空、哪咤、豬八戒等等大量crossover，是其作品一大特色，同時期主筆漫畫家無出其右者！也正好反映小强當年如何"食腦"去利用將二次創作人物加入其作品內，以吸引及增加其作品吸引度及銷售量！
濟公兩仔爺就是在其筆下世界所形成嘅其中一個系列，小濟公激奀小傻仙、濟公兩仔爺激奀豬八戒....淨係睇書名都够得意啦

鄭問。星雲大師

鄭問應該是港人最熟識及台灣最具名氣的漫畫大師，佢又分別與黃玉郎馬榮成合作過，在港出過漫畫作品，佢嘅功力同作品在行內無容置疑，
一般港人比較熟識嘅係佢嘅"阿鼻劍"、"刺客列傳"又或者係"大霹靂"，
而這本"星雲大師"雖並非年份久遠嘅舊書，大概是2000年出版，在台灣亦一定有好多人知道，但在香港就冇咁多人會看到吧。
我早知鄭問出過這本書，但都是近期輾轉之下托朋友alanwen及丹下兄嘅blog友"老劉"在台灣幫忙購入，在此嗚謝劉兄了！
講返這本"星雲大師"內容是以全漫畫形式述說介紹台灣好出名嘅星雲大師一生事蹟，是一本漫畫傳記，鄭問將星雲大師從細到大以傳記形式用漫畫畫出來，是鄭問迷必儲嘅鄭問作品！