邱福龍、林業慶。神兵科幻紀

這一套四本是2004年隨書附送嘅"非賣品"，畫得幾有心機，在眾多"非賣品"之中，算係質量相當高嘅一套書，所以儘管非太耐前嘅作品，我都會攞黎單獨介紹下；
故事大概係講未來世界，分成科技先進但無人身自由嘅"大世界"與反對勢力、背判者所結集嘅"盲城"對峙，"大世界"统治者千方百計要找出"盲城"嘅入口所在......1-4期只係故事序章篇，有沒有下文或續篇，就未有消息了！

千葉徹彌作品part 2

千葉徹彌，也被稱為日本"漫畫之王"，至今己經作畫超過50年，雖然文化、地區不同，但睇佢作品背景、故事、畫面都有好多6、70年代懷舊情懷，絕對係另類嘅集體回憶！
佢作品數量都幾驚人下，而且不少是大長篇，但香港只出過鐵拳浪子、我是鐵兵，佢嘅作品中文版，台灣就出得比較齊。
本次介紹嘅幾套佢啲作品，恐怕好多朋友都還未出世吧？！包括1961年嘅"魔球投手"1962年嘅"123與45六"，而最近期嘅也要追朔至1973嘅"我是鐵兵"！我哋一齊重温一下這位漫畫大師嘅50年前一些作品吧！

千葉徹彌短篇集，全套三本

五十嵐優美子。小甜甜45週年香港迎聖誕

每個女仔必看嘅少女漫畫至尊，小甜甜，就連曾經是世界女首富，外號"小甜甜"嘅龔如心也是小甜甜嘅超級fans，常以小甜甜髮型同打扮示人，又專誠出天價請五十嵐優美子為其畫自傳！
今年係小甜甜畫者五十嵐優美子入行45週年，特來香港舉行作品回顧展覽！某個大型商埸於是佈置了一個以小甜甜城堡、花園結合聖誕嘅展覽區。
整個小甜甜花園除了有馬車、城堡佈置之外，還有两間屋仔，一間是小甜甜嘅專賣品店，一間是用作五十嵐優美子作品展，展出咗佢自己嘅作品之外，仲有大量港日漫畫家向佢致敬嘅作品，可見五十嵐優美子嘅級數同少女漫畫祖師嘅地位非同凡响！
香港方面，就有黄玉郎、王澤、李志清、陳某、李惠珍、狄克等專誠畫公仔祝賀，當中黄玉郎同五十嵐優美子一早就認識，所以"玉皇朝"己經一早出晒佢啲作品，今次45週年五十嵐優美子來港作品展，黄生亦專程來到同佢映相、作畫慶賀一番。
在下亦係fans之一，所以佢一黎到有作品展，己經第一時間去朝拜，當然唔係想去攞什麼簽名或合照，而係純去睇下畫展啫，這個展覧一直去到一月初！得閑不妨一去，祝各位聖誕快樂！甜甜蜜蜜

本篇圖片分為4部份：
1、小甜甜的聖誕花園
2、五十嵐優美子作品圖片展及小甜甜展品
3、五十嵐優美子寫畫45週年，港日漫畫家致敬
4、私伙小甜甜收藏

以下圖片全由在下拍攝:

1221末日倒數，明天會更好，力創驕陽。黄水斌、夏偉義

既然有人話今日係1221末日倒數，咁我就要明天會更好，力創驕陽！介紹返一本勵志、有希望嘅作品。
這本書是本blog至今以來最"年輕"最新近介紹嘅書，是一本今年2012年出版，由生產力促進局、天下出版社聯合製作，也是免費派發嘅"非賣品"，你攞咗未呀？而我這本是從一漫畫店老細免費攞嘅。
天下出品，雖是黑白印刷同免費派發，但係質量確是比較高！而旦凡係這類"免費"嘅漫畫，先至有"本錢"有機會去畫一些另類題材嘅故事！
"力創驕陽"故事開頭講一個成功嘅玩具大王，回想起40多年前隻身從大陸偷渡來港，如何在陌生環境中獲得人間溫暖，並靠一雙手及生產力促進局幫忙，建立自己事業、成家立室，並得到生產力促進局提供意見、改良生產線、培訓員工及解决融資問題，遂步建立及生產出自己品牌"笑笑娃娃"，進一步開拓歐美市埸，最終成為香港一個成功嘅大企業家！
這是一本沒有武功、沒有打鬥、沒有古惑仔、沒有歹角、沒有色情嘅純本地漫畫，未必個個會覺得啱睇，但係偶而有得睇呢啲另類港漫E+就真係要珍惜！

大衛兒。回到正常

這本與"香港政府新聞處"合作，由天龍圖書負責印製嘅"回到正常"，亦是一本免費贈閱品，真係唔記得幾時出及怎樣獲得了，總之就是唔駛俾錢！
因為係免費派發的贈閱品，投入嘅資源有限，所以除了還是彩色印製有別於一般黑白嘅"非賣品"之外，其他無論是封面、內容同製作與正式漫畫無得比。
但係這本漫畫卻是我所見所閱讀過嘅漫畫之中，最關愛、最有社會責任、最具教育義意兼係免費贈閱的良心出版漫畫刋物！涉及嘅題材同宗旨亦是港漫之中絕無僅有的，可惜的是這本免費嘅"良心"漫畫卻是極少漫畫讀者看過
本書要旨係叫大家唔好歧視一啲精神病慷復者，以故事勸喻大家要給予他們重生機會及要以同情友善嘅心態去對待這類更生人士！

鄭問。臥龍先生

鄭問嘅作品一向貴精不貴多，近年更加頻停產，熟識鄭問先生作品嘅朋友，都會知道佢有幾套著名作品，不過我早前介紹嘅"星雲大師"在香港是屬冷門嘅鄭問著作，
而在佢作品之中，還有這本1993年出版用全彩色水墨技法所繪畫嘅"臥龍先生"諸葛亮也是鄭問最不為熟識嘅作品，即使是鄭問本身亦不太願意提起佢曾畫過這本書，
原因是當年應"國立編譯館"邀請，只用了12日時間而畫出了這本90多頁嘅"臥龍先生"，傖促嘅時限下所作出嘅產品未能另鄭大師滿意。好明顯被鄭問視為失敗之作，不過...每位成名嘅漫畫家總有一兩部是自己不甚滿意水準較低、不太喜歡的作品，但不是每個漫畫家都可以如鄭大師一樣坦然承認指出某套是其劣作吧！
但係一個人一雙手從頭到尾只用12天時間畫出一本90多頁嘅全彩色水墨歷史傳記漫畫，敢問普天之下又有幾人能够做到？

上官小寶、戇男。金魔鬼外傳

金魔鬼外傳是李小龍第1148期至1153期附送，全套5本完，一向喺"非賣品"之中，極少有以連續期數出晒成套故事嘅"附贈品"，這套"金魔鬼外傳"除了內文是黑白之外，故事、內容、畫功、格數全部都跟足一般連環圖製作一樣，絕無因為是"非賣品"而偷工減料，每本均畫足32頁！值得一讚唔收錢真係要蝕本架！
金魔鬼係"李小龍"一書內最受歡迎嘅邪派角色，第一殺手，武功高絕，最後還能改邪歸正，有血有肉嘅角色，這套外傳，就交代咗佢嘅父親是誰、怎樣成為兵器譜第一人。

上官小寶。李小龍復刻版

李小龍復刻版是由李小龍1143期開始隨書附送，直落總共6期，即復刻咗第1至6期，未能繼續"贈送"到第十期或至20期，當然是成本問題，而且小寶本身亦未找齊咁多期，這是非常可惜的，因為小流氓尚且可以從第一期一路復刻至龍虎門，但李小龍頭20多期卻從未被完整復刻過！

黄玉郎、馮志明。國父畫傳

上期介紹咗一本以古代名人為主題嘅非賣品"關雲長"畫冊，今期就介紹一本近代史主要名人孫中山為主題嘅非賣品漫畫畫集。
"國父畫傳"係黄玉郎、馮志明合作嘅作品，黃生畫封面部份，係一本80年代嘅"非賣品"，己經不記得當年派發這書嘅動機和原因了，但大低是基於紀念性和尊祟，而令黃生自資出版這本免費畫集吧！
"國父畫傳"內容描述咗孫中山先生從細個破除迷信、至到在香港建立"興中會"、組織革命及起義，從起義失敗到達致成功，成為臨時大總統嘅種種經歷和事跡都有深入淺出嘅介紹，加上馮志明嘅畫功，將國父孫中山畫到形神俱似，值得一讚
這是一個令人肅然起敬嘅人物，亦是一本好有心、有教育義意、健康及畫功一流嘅非賣品漫畫畫集。

李志清。超凡入聖關雲長

今個月全新主題係"非賣品"，即整個月會以"非賣品"做主題，新的"非賣品"欄目己加入本blog嘅分類內
香港漫畫書隨書附送嘅"非賣品"有好多款式，有兵器、海報、貼紙、或者係手辦公仔，不過本blog一向倡導係要以"書"為主，不論是港漫日漫美漫也好，從來都是有書在先才能衍生出其他週邊產品，這些"非賣品"也就是"書"的附(副)產品了！
故"非賣品"之中，除了兵器海報貼紙手辦公仔等等之外，也有隨書附送嘅"特刋"、"外傳"、"試閱號"、"小冊子"等等，或甚至係獨立免費派發也有，若係睇開漫畫嘅朋友，對這些"非賣品"必不會陌生！
而唔少這些原本不須要額外付錢買嘅"非賣品"，一般印數不會太多，唔少己經變得非常少見，有些"非賣品"嘅价值更是反客為主，比原來嘅書價還高好多。
今個月預計所介紹嘅"非賣品"會是來自小寶、李志清、戇男、志文、黃玉郎、鄭問、馮志明、林慶業、黃水斌、黃國興等等.....

今期就率先介紹下這本獨立贈送嘅"非賣品"，李志清嘅超凡入聖關雲長，此書二冊係為慶祝深水埗區關帝廟門樓落成，由華人廟宇委員會印製免費派發給善信嘅畫冊，由李志清操刀繪圖，本畫冊以插圖形式述描咗關公一生事跡，所以這本作為一本比小朋友嘅歷史教材亦相當合用！也可以視作一本李志清畫冊。
擅長以水彩、水墨畫漫畫歷史人物嘅李志清自然是不二之選！由於此書須要籌集捐款助印，才得以印製，印刷費用昂貴，所以唔慌會印得多。就算係免費派發，也只有少數嘅"有緣"人才能獲得的