Google+ Followers

2013年7月31日 星期三

方維新、福建。異形神探(劉定堅、文敵 編)


"異形神探"係"自由人出版"新嚐試性質嘅題材,內容幾另類新奇,主筆方維新、福建亦係好新鮮同冷門組合,但係主篇嘅劉定堅+文敵就係非常强勁嘅組合!
"異形神探",1991年出版,估唔到眨眼間己是20多年了,今日"自由人出版社"己經唔存在了,但留下了唔少港漫出品,"異形神探"便是其中一套,
內容係講一種類似"蠱"嘅異物變形虫入侵人體令其產生異變,成為怪物,但變形虫有好壞之分,新紮師兄"志文"被蠱虫入侵後成為"異形神探"對抗其他邪惡蠱虫異物,最後香港被變形虫侵佔無法收拾,須要毀滅放棄香港.......套書一開始就定咗10期完結,所以故事係完整嘅。



2013年7月28日 星期日

千葉徹彌作品 part 3

千葉徹彌與手塚治虫同年代嘅漫畫家,手塚治虫被稱為日本"漫畫之神",千葉徹彌則是"漫畫之王"。
不過千葉徹彌就只有"鐵拳浪子""我是鐵兵"喺香港有出中文版,要買佢其他作品就必須從台灣入!千葉徹彌工作室授權台灣東立嘅中文版就出晒佢啲大部份作品。
點解要睇佢嘅漫畫?其實都俾唔到乜嘢理由唔睇呢啲漫畫,而且應該係率先睇晒作為"漫畫"嘅入門!因為佢除與手塚齊名之外,佢嘅漫畫好多景物都充滿小鎮、鄉間、小島風光,古樸純厚嘅鄉村情懷同氣息是其他作品所找不到的!
今次介紹嘅幾套作品,統統都至少係近50年前嘅作品,但即使係超過半世紀嘅作品,一樣咁有味道,"漫畫之王"絕非浪得虛名!

島之子,1964年作品
美紀乘搭嘅輪船被迫在貧寒落後嘅小島停泊,美紀一家與古怪落後嘅島民溝通、感化,促使小島建設改變"脫貧",成為樂園.......

望海的少女,1959年作品
雅華母親病逝,父親在外國失踪,變成孤女,她一方面在孤兒院生活,一方面守護住舊屋,堅信一天父親會歸來,可惜.......

小蟻之歌,1965年作品
城大介出到一個偏遠山區做教師,面對一群山區小朋友,遇到種種難題,如何去解決和教導他們呢......?


小雪的太陽,原名「yuki的太陽」,1963年作品
孤女小雪被富家人收養,搖身一變成為千金小姐,她將要面對和適應與以前截然不同嘅生活和事物,究竟她最後會如何决擇生活方式?

萬能旋風兒
石田國松有超過人嘅運動細胞,棒球、劍擊、柔道、拳擊、足球......等等都係佢强項,每次佢加入學校不同嘅運動學會,都誓要奪取冠軍!

2013年7月25日 星期四

懷舊日本超人系列:七星俠、超力神勇俠.......

今期本來介紹千葉徹彌作品,摷唔晒出黎,所以順延到下次,不過今期都係介紹返啲同年代即60年代至70年代嘅日本超人片集嘅港版七彩超人書。
七星俠、超力神勇俠、超力人.....相信冇乜果個年代嘅男仔未睇過呢啲電視劇,七星俠係日本最早嘅特撮超人,首現於1967年,超力神勇俠則約是70年嘅片集,
超人打怪獸電視劇喺香港大受歡迎,自然要出返啲超人書,全書七彩,都係賣6亳子至1蚊雞

2013年7月22日 星期一

上官小強、甘小文、利志達。童年現在、一般可愛,壽星仔part 6


"壽星仔 "從401至500期,出版期間由1988至89年,當中有唔少漫畫人都有份參與,有作品刋登,包括甘小文、利志達、小豆、大粒墨、徐大寶、黎智昌、邱福龍、BEN、林祥焜、北京陳....等等
而甘小文係一直每期都有作品在"壽星仔 "內刋登嘅漫畫人,而且唔少係靈異奇幻作品。
"壽星仔 "至到480期為止,正式脫離"玉郎機構",改由小强自資嘅"小强出版社"繼續出版,481期也正式改書名為"金裝壽星",睇返這一百期,內容故事又以神怪靈異為主,在下這一百本己經儲齊了,大家可以睇返這段時期嘅封面,實在有好多都好有心思嘅設計,相當之精彩!

"壽星仔 "甘小文、利志達、黎智昌作品連載一覽:

甘小文作品:401-500期,每期一篇
利志達作品:412、424、425、500,門前雪,454期精選短篇"鉛筆",481期利志達作品回顧
黎智昌作品:451期"影子世界"

"壽星仔 "訪問、專輯一覽:

鄭問專輯:481-483期
小强專訪馬榮成:489-490期
少傑專訪:498期

401-500期全封面:


2013年7月19日 星期五

畫時代,CUSON。我的港女老婆

香港現在除了打打殺殺、江湖書同武打書以外,究竟還有沒有一級、適合"普遍"讀者閱讀嘅漫畫?答案係有!但係唔多!
十多年前己經唔再買新出嘅港漫,只從二手市場補買入舊書便算,所以近年新出港漫基本同在下好疏遠!
若問在下現在還有沒有一本本地漫畫係願意用真金白銀付出即買嘅新書?答案係有,亦只得這一套,今期介紹嘅CUSON作品"我的港女老婆"!
CUSON,近年獨立漫畫家,背後冇一個大嘅本地漫畫公司支持,初初畫政治漫畫、插圖家,現時作品每日在報紙刋登,2010年首出單行本個人作品"我的港女老婆",至今年己經出到第七本,本書大賣,首兩集己經絕版再加印到第三、四版,雖知這書售價絕不平宜,$68一本係本地薄裝港漫5倍價錢,兼且係內文係黑白印製,証明咗好嘅作品,有HEART嘅作品,香港一樣會有足夠嘅讀者返來支持,仲有好多人係睇漫畫、願意付出真金白銀去買新書架!喺呢個自由創作、自由出版、自由選擇嘅香港,銷量不濟嘅責任,不在讀者,而是時候該檢討下重覆拖長流水式嘅故事同作品發生緊乜嘢事?
"我的港女老婆"如何界定這套書類別?因為佢唔屬於正宗港漫式連環圖,亦有別於老夫子、牛仔王司馬嘅四格六格,只能夠說是介乎兩者之間、有些少"繪本"成份,係地地道道香港土產漫畫,
這本書嘅成功元素係貼近現實、貼近時代、貼近我們生活嘅"共嗚感",與所有武俠打殺、江湖連環圖等脫離現實、超越想像嘅漫畫唔同,書內嘅主角生活,就係現實生活中嘅你我他!
CUSON本身嘅畫功底子己經非常不俗,畫風亦討好,輕鬆搞笑式漫畫曾有過唔少,但係CUSON嘅公仔靚、表情生動傳神,充份利用咗搞笑幽默成份之餘,佢作品更具有時代感、共嗚感!或者係正如有朋友所講,這類還未發達又獨立嘅漫畫家係特別有創意同有heart。

我的港女老婆,1-6集,加一本前傳,內容有單格、雙格、四格、5格、6格、8格、9格,也有短篇.....



2013年7月17日 星期三

狄克。明仔日記

狄克1984年嘅"明仔日記"係佢最早作品之一,一期完輕鬆搞笑愛情小品,亦係狄克愛情作品之中最早之作,本書用咗大量輕鬆搞笑嘅手法去描寫"明仔"感情生活,而為咗表達出本書搞笑風格,更將"壽星仔"人物放入書內成為其中角色,甚至將上官小强本人都漫畫化放入書中扮演一角!
當年就係咁樣間中嚐試出版一些類此這本"明仔日記"嘅小品式漫畫令到漫畫市場比較上多元化多選擇一些。


2013年7月13日 星期六

上官小龍。半世人


所謂唔同題材漫畫有唔同要求,也有唔同嘅"閱讀味道"!鬼故題材係其他書種不能給予嘅另類"閱讀味道",而鬼故漫畫有時唔一定要畫得好靚、畫功唔一定要好高,氣氛同講故事能力最緊要高!
以前人類平均最少有60歲命,但若係30歲時就死去......本書話就會變成好猛鬼嘅"半世人"喎
本書女主角被"半世人"冤魂纏着,最終亦難逃劫數!

"半世人"上官小龍作品,1977年出版

2013年7月10日 星期三

畫時代 司徒劍僑、永仁、黃國興。賭聖

80年代尾90年代頭賭片電影大興,於是也產生了港漫另類特殊題材--賭書漫畫。
賭書漫畫當中最長壽嘅一套,就係由司徒劍僑、永仁所畫,自由人出版嘅"賭聖",全書共158本,從91年開始,連載長達三年多。
套書乘住賭片個勢,瞬卽成為"自由人"創業期皇牌出品之一,果時率先以一連串明星畫像作為每期賭書封面,令人印像深刻,也是賭書標誌,吸引到唔少青少年追星族購買偶像封面而成為當時受歡迎嘅港漫之一!
套書除了由劉定堅編、司徒劍僑、永仁畫嘅"賭聖"故事之外,每期還加插唔少專欄、短篇漫畫、專訪等等,插圖、專欄圖片及專訪等等,皆由黃國興負責,而且係做足158期,所以收藏興豬作品嘅朋友都唔好錯過這套書。
"賭聖"一書可謂見証咗"自由人"最風光嘅出版歲月,當中裡面最精彩首當係睇劉定堅專欄"漫畫企業"一路吹水超過150期,意氣風發踩盡玉郎、小寶、馬sir及其他同行出版唔惦,當時得勢當然係有風駛盡悝,若然現在睇返認真得啖笑

賭聖全部158本封面:




首創以一連串明星畫像作為每期賭書封面,剩儲啲明星漫畫封面都值回票價啦(唔同玉郎漫畫Q版果隻)

2013年7月7日 星期日

江湖恩怨江湖了斷!畫時代 牛佬、倫裕國、韋研、方維新。古惑女

今期TVB"畫時代介紹咗江湖書"古惑仔",不過套書依家仲出緊,所以就先揀選牛佬同一班底泡製嘅"古惑女",一樣咁正,係古惑仔姊妹作,亦算係本BLOG首套介紹嘅江湖漫畫
向來以女性做主角嘅港漫係好少數,以女性做主角嘅江湖漫畫就更絕無僅有,呢套就咪錯過啦!
故事之中嘅三個女主角,波子、飛雞、VAN仔好明顯係刻意營造女版龍虎三皇,原來此書大有來頭,曾被改編為電影"古惑女之决戰江湖",由李麗珍、莫文蔚主演,仲一度成為當年票房冠軍!
"古惑女"95年出版,全套共44期完結。



2013年7月4日 星期四

畫時代 劉雲傑。百份百感覺+畫集

若果要向來自外國嘅朋友驕傲地推荐一本香港代表嘅本地地道漫畫,可能各位心目中馬上各有不同嘅心水、選擇同見解,不過對於在下黎講,"百份百感覺"係唯一首選!
劉雲傑先生從最初喺"怪異集"嘅4格,到"漫畫少年"、再到"段段濃情",佢啲畫一路都係keep得咁正,終於就爆出咗超紅嘅港漫愛情精裝本"百份百感覺",令到電影、電視、小說都爭相改編,就算未看過原著漫畫嘅朋友,也都無人唔知"百份百感覺"這個名字,"百份百感覺"就係現代港漫愛情漫畫至尊代表!
劉雲傑嘅係香港極少數能够同時兼顧吸引到男女讀者嘅漫畫家,畫時代訪問祁文傑先生講得無錯,劉雲傑有市場,只但係致命傷係出書太慢,否則以佢嘅畫功、成績必定拍得住目前香港至top嘅馬sir同邱福龍!
"百份百感覺"全套16本,從1992年11月出版第一期至到2007年7月出版16期最後一本,足足用咗15年時間去完成,破盡港漫史上超慢紀錄,但係睇到佢每一格每一頁都係精心畫制,誠意同對畫藝嘅要求、堅持精神己經超越咗一切!可以講係惟一唔會為金錢去加快推出作品嘅本地漫畫家!作為讀者亦一定會深深感受到他那份對畫畫嘅執着、堅持同狂熱,所以一套咁有誠意、堅持、畫功卓越嘅作品,己列為必看必買漫畫!



2013年7月1日 星期一

畫時代- 狄克。白頭戀曲

TVB畫時代節目今期介紹嘅正正是狄克愛情漫畫"狄克戀曲"中嘅白頭醫生,因為故事頗受歡迎,所以大約在1995年,狄克劉定堅將白頭醫生嘅故事抽取出來,成為自由人出版嘅精裝單行本"白頭戀曲",故事係以白頭醫生串連成一個個戀愛故仔。
這套97前精裝版愛情故事漫畫每本厚達130頁,賣33蚊,只出過三期,眨眼原來己差唔多係20年前出品,以今時今日黎講訂價都算係幾貴,但當年讀者仍然願意付出這個價錢。