黄偉建。暴男

相比起黄偉建嘅"靈幻小姐"、"俠骨神鑑"，暴男無疑是佢一部無咁出名嘅作品，不過在下認為呢套"暴男"劇情同故事係唔錯，只要係畫功若再好啲、投入嘅資源、助理陣容、實景再做好啲，套書嘅可觀性就會強好多，銷書量亦應不只於此！
因為上述及種種原因，套書最終都係未能為讀者接受，市場决定咗套書前途，只有短短嘅5期就完結！
"暴男"1992年玉郎出版，共分為兩輯，頭1-4期為第一輯，第二輯原訂5-6期完，但最後只能濃縮為一期完，雖然係草草完結，但相比起一些不負責任嘅爛尾作品，己經算非常有良心及道德了！

"暴男"故事係講主角傲青加入咗中國成立嘅一支擁有超能力特殊部隊訓練，最後背叛逃離咗組織而被組織派出超能力殺手追殺，大戰連場。
在第二輯故事即最後一期講到傲青逃亡到一個反政府組織嘅小島村莊內生活，政府軍派出靠吸食特殊藥物增强戰鬥力嘅"八四"部隊到小島進行屠殺清洗，傲青選擇與全島民眾共存亡.....最後，小島村民眾被特殊軍隊全部韱滅，而對方人多勢眾，傲青是絕無生機......
本書雖無提及創作嘅理念同動機，我們無從揣測作者心意，不過從套書嘅內容、故事、人物、地點，加上最後一期出版時序剛好是六月，大家或可領會作者心意？

王澤。老夫子三大一期完連環故事之 古老村

老夫子一向以六格四格一頁漫畫為主，較長篇幅一期完結嘅連續性故事，記憶之中幾百本老夫子出品就只有三本係一期完，這幾本亦都甚為少見，分別為猛鬼廟、狐狸仙及今次介紹嘅"古老村"故事。
"古老村"成個故事有成8、90頁，出過單行本，而在下收藏嘅係合訂本。
"古老村"故事係講老夫子等人承接咗一單幫人運貨到"古老村"嘅生意，原來"古老村"地方偏僻，啲人尚未開發，一切衣着、行為就如古代一般，於是老夫子等人便如古代押鏢一樣化身為鏢頭，中途當然搞到笑話連篇，現代武器大戰古代兵器暗器，笑料百出

邱福龍、周勝。公仔書(鐵血戰士)

公仔書係邱福龍第一本個人作品，套書由龍乘風出版社出版，日期大約係90-91年，龍少個主打故事係"鐵血戰士"，以怪獸科幻類作為龍少第一本作品嘅題材，當然係完全適合佢發揮！
不過實際這套書是一套綜合漫畫，除邱福龍外，主筆尚有周勝、西華、梁偉傑、余健培、李志全等。而龍少套"鐵血戰士"喺第一期內畫足36頁，所以佢第一本單行本作品實為"公仔書"(鐵血戰士)第一期，而"公仔書"(鐵血戰士)第二期只佔一半便完結咗故事，第二期另一半則為周勝接力嘅新故事"魔界追魂"，
第三期就成為百份百綜合漫畫，除有邱福龍與西華合寫嘅"逃走"之外，尚有余健培、梁偉傑嘅作品，邱福龍只畫到第3期，之後就全力投入第二套個人新書"東方不敗"，冇咗龍少，"公仔書"只去到第6期便告完結。

公仔書第一至六期全目錄；

第一期：鐵血戰士(邱福龍)
第二期：鐵血戰士下集(邱福龍)、魔界追魂1(周勝)
第三期：逃走(邱福龍、西華)、魔界追魂2(周勝)、ET  GIRL(余健培)、貳星情緣(梁偉傑)、外星趣兒1(余健培)
第四期：魔界追魂3(周勝)、外星趣兒2(余健培)、交換命運(李志全)
第五期：魔界追魂4(周勝)、外星趣兒3(余健培)、夢殺(李志全)
第六期：魔界追魂完結篇(周勝)、外星趣兒4(余健培)、野心胎夢(李志全)

上官小强。壽星仔part 4 之 壽與天齊

壽星仔係港漫70年代最長壽漫畫之一，跨越70-90年代。
201期至300期嘅壽星仔，其實步入咗非常成熟隱定嘅時期，可以講啲內容同故事都好好睇，而正因壽星仔內容故事可以時空穿梭、隨意發揮，天馬行空，所以長畫長有唔會覺得題材重覆。因為當時期鬼書大行其道，於是睇到壽星仔故事加入大量神鬼魔幻嘅元素，有咗大量搞笑式神鬼魔幻故事，實為壽星仔獨有！
除此以外，壽星仔內容還有小强信箱、漫畫消息、漫畫人介紹，而讀者投稿專欄就包括咗唔少其後加入漫畫界成為主筆嘅初登之場，甘小文亦有大量早期短篇作品登於壽星仔之內！
282期開始，壽星仔內嘅人物角色更出獨立一頁故事如：和尚仔新篇、華應蟲手記、火蔴仁傳奇、肥婆四故事等等，陪我哋渡過咗80年代歲月！

以下為201-300期封面，其中有唔少過癮得意之作，同時刋登埋壽星仔月曆，當中有邱福龍、祖兒嘅壽星仔作品，更加唔好錯過官小强與馬仔黃玉郎等遊日本特輯、小强訪問池上遼一、藤子不二雄特輯！
200-300期在下尚欠三本，若然之後找到就會在此補回所欠嘅封面！

雪晴作品part 2

雪晴係香港近年產量最多嘅女畫家，現時作品由馬榮成嘅天下負責結集出版，至今有近40本嘅精裝版著作，以每冊平均160頁來計，雪晴出道至今己經累積咗幾驚人嘅作品量，真係好大部份現時嘅男港漫畫家產量都唔及她！
雖然香港嘅男讀者可能較少接觸較少了解雪晴，不過這樣都無礙佢受歡迎程度，因為棒場客大部份係女讀者，即使要賣30蚊一本嘅精裝漫畫，對於這班女性讀者黎講係小兒科，所以市場一樣可以吸納幾好嘅成績，無他嘅，因為今日港漫愛情故事漫畫幾乎由她獨家包辦！
雪晴初出道嘅時候，公仔都係模仿"安達充"風格，同時亦都跟足日本少女漫畫風，大眼、大頭、型男靚女、可愛、得意、瞬間變Q版嘅模式，就這樣簡簡單單，唔駛追求高深畫功、特別情節故事，都一樣可以賣得幾好嘅數量，在下相信假以時日，雪晴作品一定會有相當豐富嘅"規模"，港漫一姐地位指日可達！各位港漫讀者會否考慮像在下般支持下本地女漫畫家呢？

鄭問。深邃美麗的亞細亞

台灣國寶級漫畫家鄭問，這套作品在日本講談社出版，是一套好另類嘅創作，題材好神奇，書中嘅人物奇特、各具異能，故事亦寫得相當古怪魔幻。
對於鄭問嘅畫技功力，在台灣在日本無疑是非常高評價，不過作為旁觀者兼讀者意見，在下認為鄭問老師作品流於高深刁鑽，未能普及化大眾化，欠缺廣泛性讀者，局限咗讀者羣，因此而未能令到更多讀者欣賞閱讀到鄭問作品，咁樣誠言對於擁有高畫技造藝嘅鄭問係幾可惜同浪費！
觀乎佢嘅"阿鼻劍"、"大霹靂"、以及這套"深邃美麗的亞細亞"均是叫好而未能叫座，反而在下認為以鄭問先生嘅畫功功力，若專注於畫歷史類漫畫，必定會有更高成就、吸納更多讀者羣支持，例如佢嘅"東周英雄傳"、"刺客列傳"，在港台同類漫畫之中，堪稱無人能及！鄭問先生實應該朝着歷史漫畫嘅方向發展下去！
"深邃美麗的亞細亞"在下所睇嘅唔係套書嘅內文同故事，而係純從欣賞鄭問大師嘅非凡畫功而收藏本書，而作為漫畫迷、漫畫人嘅朋友，也好應該keep返套作為參考，因為值得同行"參考"嘅漫畫作品實在係好少！

漢民。鬼語、鬼井

炎炎夏天就快到，這時候睇書最啱就係睇鬼書够清涼消暑
鬼語、鬼井係漢民22本怪談系列其中兩本，漢民怪談系列可以說是"怪異集"前身！
鬼語、鬼井1983年出版，亦剛嚐試轉為彩色印製，而相隔3年後在"怪異集"合訂本內重出這兩本書內故事時，就改為黑白色，可以講睇鬼故其實黑白同彩色都各有特色。

鬼語：
主角在一富商嘅花園聽見善鬼與惡鬼對話，善鬼要向富商報恩、惡鬼則要報仇，於是善鬼與惡鬼協議分別去幫助及謀害富商嘅兒子及女兒，其間不得干涉對方行動。原來是善鬼刻意安排讓主角聽見"鬼語"，等他去幫助富商女兒逃避劫難.......

鬼井：
家旁有一座古井，卻不知自何時井口被上了鎖,某日井口被意外打開，於是曾經浸死困在井內女鬼出來害人.......

永仁、蔡景東、歐錦銓。涉谷愛情

己久違了的愛情漫畫，在8、90年代曾大行其道！當中有成功嘅例子，但亦有唔少失敗嘅例子.......
"涉谷愛情"嘅創作劉定堅，喺80年代初做過TVB"歡樂今宵"編劇，大家可還記得佢所創作嘅"曲中情"，以歌曲注入成為故事劇，在"歡樂今宵"時段播出，84年劉加入玉郎漫畫，於是就誕生咗狄克嘅"情若無花不結果"漫畫，當年大受歡迎！至到劉定堅嘅"自由人"成立，於是就來創作咗這套"涉谷愛情"故事漫畫。
套書以一位愛情醫生嘅愛情CASE串連成單元故事集，每期一個獨立個案，不過套書唔賣得，故只得短短8期就完結，也就變成咗一套頗冷門嘅愛情漫畫。

藤子.F.不二雄。SF短篇完全版

若果睇港漫打書係令你覺得刺激興奮，咁睇藤子不二雄、安達 充嘅書我會感覺到有開心同快樂嘅感覺！例如睇藤子嘅"叮噹"，你就會獲得快樂嘅閱讀元素！
而相對於叮噹、忍者小靈精、Q太郎、神奇小子這些名作，這套藤子不二雄早期嘅SF短篇奇幻結集作品，唔係太多朋友睇過，但這套超過110個短篇所結集嘅早年作品之中，有來自未來的機械人、有時光機、有小鬼Q太郎、有來自未來嘅自己，對於藤子往後嘅一連串長篇著名創作如Q太郎、叮噹、神奇小子等有一定嘅啓發性影响！所以這全套共8本嘅奇幻大全集，有如日本版嘅"怪異集"，刋載咗自1968年起至1995年所有藤子嘅奇幻怪異著作短篇共112篇，應該係藤子迷收藏嘅寶鑑！
只可惜這套書香港還沒有出過中文版，只有台灣版本，而且訂價超貴，這套以書價近千元港幣從台灣托朋友購入嘅一手新書，對在下慣買二手平書黎講，己是超乎限額嘅數字，不過依然係覺得值得收藏

安達 充作品part 1

最初直覺告訴我安達充啲公仔同畫風，絕對唔係我鍾意睇嘅類型，我相信佢啲畫同作品絕對唔啱我睇！
但係當我偶然咁好勉强咁揭過佢一套作品睇咗幾頁之後，從此安達充先生就變成在下至愛至TOP嘅漫畫家！瘋狂咁愛上佢嘅公仔同佢嘅作品，講緊係當我82年初次閱讀安達充先生作品時嘅心情........
時至今時今日，佢係唯一一個所有作品我都會優先睇晒嘅漫畫家！冇錯，佢就係在下No.1至愛嘅漫畫家！
安達充嘅作品好生活化、小品、自然，筆觸清新而簡練，人物感情隨心而就，純真而簡樸，又有對人物性格幽默嘅諷刺，佢筆下男主角通常都係小人物，女主角雖然都標榜"可愛"，但性格通常都係男仔頭。
安達充漫畫風格柔合咗少女與少男漫畫，加入咗熱血青春運動項目元素，所以形成佢嘅漫畫適合男性與女性讀者閱讀，而能夠做到對男女讀者均有引吸力受歡迎嘅漫畫，難度可謂超高級！可以講香港加日本嘅漫畫家可以做到嘅屈指可數！
安達充首部作品見於1970年，1990年時，其單行本突破1億銷量，2008年，其單行本突破2億銷量，佢嘅作品被改編拍成無數大受歡迎嘅電視劇、電影、卡通等！

安達充作品一覧：
    《Nine》《九優》　全5冊

　　《夕陽升起》（《夕陽上升》）　全2冊


　　《陽光普照》　全5冊

　　《美雪美雪》　全12冊

　　《Touch》全26冊

　　《短篇集》 全3冊

　　《含羞草》全7冊

　　《Rough》　全12冊

　　《虹色辣椒》　全11冊


　　《H2》　全34冊

　　《親子戀人》　全1冊

　　《超能力美空》全5冊

　　《KATSU!》全16冊

　　《四葉游戲》連載中

黃國興、狄克、馮志明、伍錦寧。漫畫豬嘜

黃國興係搞笑漫畫代表之一，這套"漫畫豬嘜"就係其個人代表作品之一，1988年出版，全套4本，是興豬剛剛離開玉郎之後嘅創業之作，除了有興豬自己搞笑作品之外，尚有伍錦寧幾套作品，還請來狄克、馮志明客串，所以也算是一套綜合搞笑式漫畫！