Google+ Followers

2013年1月30日 星期三

朋友Eddie兄嘅收藏分享


Eddie兄亦係一位在下寫這個Blog才認識嘅Blog友,不過而家己經成為朋友今次所登佢啲叮噹書及其他部份港漫,相對於佢真正背後嘅收藏書,只係碎料!
因為佢係一位超勁級嘅漢民收藏家!若以在下嘅評定,以曾經所有以前及現在在網上開過Blog嘅朋友來計,就只有blog友Oiman兄可以與Eddie兄不相伯仲,橫版類相若,直版類Eddie兄就更見齊全!最犀利嘅係佢啲漢民橫版書係最初逐本逐本在報紙檔1蚊雞買返黎儲,所以本本新淨近9成,可惜佢只係鍾情於鬼故漢民,對於其他雜項如小威玉郎小寶書不太愛收集,否則肯定更厲害!
而佢相對於其他收藏家係極之低調嘅隱形超級收藏者,若果如非在下開blog,被Eddie兄睇到入黎交流,就根本不會被發現,因為佢以前一路買書,睇完就將啲書收埋擺係老豆嘅牀下底,然後返大陸居住同做嘢,就咁樣幾十年來過去,冇人知道佢豐富嘅收藏,直至在下有幸得見!估計Eddie兄嘅漢民鬼書收藏量同質,係我所知道、認識嘅朋友、blog友之中,至少在三甲之內!
因為Eddie兄長期不在港,有部份書交托在下處理,所以今次登出嘅書,係部份處理中或己經處理咗嘅書,當然事前也徵得Eddie兄同意,登出部份!至於佢其他嘅收藏,則還須有待佢同意才能登出了。

咪睇少這堆叮噹書,若你是叮噹嘅收藏者,這堆陳年叮噹就會視為寶物!



2013年1月27日 星期日

司徒劍僑、永仁。殺劍

這套屬於司徒劍僑較早期嘅作品之一,也是他第一套超過30期嘅中篇作品,是類似刀劍笑式嘅武俠漫畫(不過最後變成了神怪科幻類),自由人出品,馮志明顧問,還請來"怪異集"封面大師陸偉昌幫手封面美術。這套書開頭成績應該不俗,加上自由人出品嘅書又好少出現爛尾,但這套"殺劍"出到39期便告爛尾,
查察估計係當時司徒劍僑、永仁另一本新書"賭聖傳奇"一出大賣,要全力投入摧谷製作該書,所以放棄銷量下滑嘅"殺劍",不過這套預告就快完結而最終爛尾嘅"殺劍",無疾而終就相當可惜!

"殺劍",全套39期,1989年10月出版,1991年1月1日出版39期最後一本



2013年1月24日 星期四

謝志榮。黑色假期、諾言、懸崖對話

喺7、80年代初橫版書時期之中,除了漢民橫版鬼故書之外,仲有謝志榮嘅一些橫版鬼書作品係幾有代表性!當時沒有太多嘅娛樂款式,睇鬼書或連環圖成為唔少人嘅低消費消閒娛樂!
這本"黑色假期"係期中一本,書內有三段故事:黑色假期、諾言、縣崖對話,"黑色假期"係講眾人參加了一個詭異旅行團,遇到了恐佈經歷,"諾言"是講主角向碟仙許下誓言,導致禍從口出...."懸崖對話",一對新婚夫妻勾心鬥角、爾虞我詐。



2013年1月21日 星期一

李志清。那年的天空很藍(繪本)

繪本、四格六格、連環圖,都屬於漫畫類別。繪本是現時流行嘅新一類漫畫方式,首次在此介紹漫畫繪本,也是李志清第一本繪本作品。
內容是描寫主角從鄉間到城市、從小到大到老嘅回憶片段,當中又包含咗鄉土情懷、也有少少對環保控訴。而其中以描寫主角與所養的一隻狗仔嘅一段感情比較寫得細膩感人一些!
這本繪本以淡靜情懷、平靜回憶述說過去故事,同一般睇開刺激打鬥連環圖截然不同,所以未必每個朋友都啱睇,讀者羣可以完全唔一樣,或只適合像在下般"雜食"或有返咁上下年紀嘅大朋友睇!不過若係覺得睇得刺激打殺連環圖太多,轉轉口味調劑一下,那麼這本"那年的天空很藍"都係一個幾好嘅選擇!



2013年1月18日 星期五

崔成安。美人動態圖、太極拳

香港大師級嘅畫家,我或者只會想起崔成安大師!佢畫鬼故、愛情故事超一流,武俠亦絕無問題,不過佢好多年前己經半退休移民咗加拿大,根据資料加報料,住緊過萬呎大屋,並榮獲加拿大卑斯省成就傑出華人獎,也是因為佢嘅藝術功力在彼邦早己得到認同!
而這兩本畫集真係相隔咗好多好多年後技癢才出,由加拿大出版社出版。
美人動態圖係一本純用鉛筆素描式繪畫,崔大師畫女仔面相、動態、形姿之靚及神似,我喺香港揾唔到邊位漫畫家畫女仔可以靚得過崔大師,唔少香港漫畫家提筆去畫好一幅女仔是好有難度,相反可以感受到崔大帥佢可以以筆觸好輕鬆流暢就畫得出靚嘅人像,畫男像與女仔像都揮灑自如,對佢完全無難度!高手之中嘅高手!
這本畫冊"美人動態圖"出得極小量,甚至這本未見過賣任何廣告宣傳,相信只係作為崔大師同fans之間嘅交流作品,絕對唔係為賺錢,因為出得唔多,所以佢本本都簽晒名!
另一本"太極拳"畫冊更係佢多年後復出嘅首本個人作品,並請來黃玉郎祁文傑何韻詩寫序;
黃玉郎在序中以"好朋友"相稱,內容大概係讚揚佢係好識享受人生嘅人,而雕刻、海報創造、園藝等各方面都係專家級!真人結合漫畫風格更是無人能及,更提到兩人結伴潛水嘅往事。
這本"太極拳"畫冊,主要是以漫畫連環圖方式去介紹太極拳嘅各種招式套路,相信跟住佢本書自學太極拳都可以的,不過要等到可以攞生果金嘅年紀先,因為果時該有空閑耍下太極



2013年1月14日 星期一

馬榮成。陸小子


馬榮成畫武俠技擊漫畫大把,但畫武俠搞笑嘅單行本橫版書就只得這一本,約80年代初出版。其實早年馬sir所出嘅橫版書並不太多,所以這本獨一無二嘅搞笑武俠書嘅價值其實應該將會更高!




2013年1月11日 星期五

漢民(柳依依)。蘭閨驚豔、憂鬱的情鴦、情花處處開、點點懺情淚、情歌難忘

作為漢民嘅長期fans,我可以肯定佢係擁有最多不同筆名嘅漫畫家!可能佢精通擅長研究數術命相關係,所以佢漫畫筆名嚐試轉換過甚多,最後才定下以"漢民"為長期筆名,當然"漢民"也就是最終是最成功、最多人認識及寫作了最多的個人作品所用嘅筆名!
不過佢最初還以"柳依依"扮作女畫家,出過了唔少愛情文藝漫書2毫子書仔,而這些書名都極之文藝化,今次就喺本blog首次介紹在下所收藏他以前一些這類2亳子書仔,而更多佢嘅2亳書仔稍後亦會陸續介紹!
今期就先介紹佢幾本極"文藝"、但在現今角度睇又相當"老土"嘅愛情文藝故事,蘭閨驚豔、憂鬱的情鴦、情花處處開、點點懺情淚、情歌難忘....這些70年代嘅漢民作品,內容、畫功未必吸引,但至吸引係這些書嘅懷舊同歷史嘅回味!



2013年1月8日 星期二

狄克、上官小寶、志文、黃偉建、鄭健和、甘小文。情書

80年代畫港漫愛情故事最成功者,非狄克莫屬,佢套"情若無花不結果"在"玉郎漫畫內刋登,即大受歡迎,其後獨立出版"情若無花不結果",一出就超過100期,之後再出"愛的故事""狄克戀曲"統統可以出超過一二百期,至90年代中,港漫愛情故事題材熱潮才遂漸告一段落!
"情書"就係這段時期作品,全套共27期完,97回歸年出版,係狄克首度與鄺氏合作嘅作品,這套書可能唔太出名,或在大家心目中不佔什甚份量,不過對在下黎睇,是絕對值得珍藏!因為這套書除狄克主打之外,初期還加入大量有份量主筆,包括上官小寶、黑山老妖(即志文)、甘小文、黃偉建、陳佳華、鄭健和、牛輝,還有陳順康做封面,所以卡士十足!

"情書"1-27期目錄內容:
狄克-----------------------愛情醫務所1-27期,"情書"1-27期連載
甘小文---------------------顧收皮心理專門店,"情書"1-8期連載


其他各期目錄內容:
01期
志文-----------------------女人的設想
吳文輝---------------------失戀

02期
上官小寶-------------------緣來是你

03期
黃偉建---------------------心愛

04期
鄭健和---------------------一個幾分鐘的約會

05期
陳佳華、鄭健和-------------要是有緣上集

06期
陳佳華、鄭健和-------------要是有緣下集

07期
黃偉建---------------------小氣鬼的戀愛故事

08期
家輝-----------------------暗戀他

09期
黃偉建---------------------白衣天使

10期
陳佳華---------------------折翼天使

11期
康津田---------------------相向感覺

12期
家輝-----------------------辦公室的公主

13期
黃偉建---------------------燃燒的淚!

14期
家輝-----------------------神聖的婚約上


15期
家輝-----------------------神聖的婚約下


16期
陳順康----------------------要死去的愛情故事

第17期開始至完結,全部係狄克作品,再冇其他主筆助陣。


1-27期陳順康勁靚封面!




2013年1月5日 星期六

白金龍。少林英雄洪熙官

新一代讀者己經冇乜人識得"白金龍"了,但其實即使連在下呢啲"舊時"讀者,都不太清楚有關白金龍太多嘅事,甚至連佢嘅其他筆名或姓名也不知道!老實講,佢啲公仔同畫功,根本唔係我所欣賞嘅,所以一向對佢嘅研究好少!若夾硬去介紹,可能係錯漏百出!所以就無謂多作介紹了!
不過都知迷離境界、封神榜、小悟空、彈劍江湖、天劍龍刀、包青天....統統都係佢嘅作品,人冷作品亦套套都冷,以上各套書要集一两本不難,但要齊集成套的就真都太難!而比迷離境界、封神榜、小悟空、彈劍江湖、天劍龍刀、包青天這些書還要早期還要難齊嘅,尚有一套70年代嘅"少林英雄洪熙官",這套算係白金龍武俠書中最長集數,出至到第20集都應該係爛咗尾,
這套書1-20期,我見都未有朋友或blog友集得齊這套書者,在下有幸以一個非"白金龍"迷而集齊一套,今日就在本blog率先一氣呵成show晒全套20本俾大家睇下,連埋少少第一二期內文.......







2013年1月2日 星期三

張萬有。極道惡拳

張萬有可謂黃玉郎成功嘅背後功臣,係唔係?
佢主編過龍虎門、李小龍、醉拳、如來神掌、中華英雄五大港漫,前無古人後無來者,因為這五套至經典書己經完結了!不過可惜的是以佢自己名字出版嘅漫畫卻沒有一套是成功或持久的,反而大多數卻是爛尾之作,只能嘆一句天意如此.......又或者當初揾漢民先生看看八字,改個筆名,會否好一些?但無論如何,萬有不再畫嘢,某程度上係讀者嘅損失吧
極道惡拳應該係萬有最後一套作品,原本7期完,但到第6期己經捱唔住爛尾!這套書佢要勾頭、畫身、起稿度橋一腳踢,冇晒助理,書況稿質自然唔好要求太高,但畢竟係佢老人家最後一套作品,那些年我哋睇過晒佢嘅龍虎門、李小龍、醉拳、如來神掌、中華英雄,就算冇感情,也該有回憶吧?作為長期嘅讀者,張萬有係其中一位不能缺少同忘記嘅主筆!這幾本佢最後作品,怎樣也應該保留返一套留念吧!