Google+ Followers

2012年8月29日 星期三

黄玉郎、漢民。小吸血鬼、鬼手

今日係農曆7月14,中國傳統鬼節,盂蘭節正日,梗係要揾返本正嘢鎮下場,整返本黃玉郎+鬼故大師漢民出黎助陣,咪够晒氣氛囉
講返黃玉郎,打書就一大堆,但鬼書就唔多見架,這本"小吸血鬼"+漢民"鬼手"兩位大師合作嘅就真係超經典!至於書本嘅內容、故事、畫功,一切都不再重要,
重要嘅係這類書嘅一種獨特懷舊情懷,以下請欣賞下兩位大帥幾十年前嘅漫畫作品.......


2012年8月26日 星期日

楳圖一雄的驚異系列

一連三期,先有伊藤潤二,再有手塚治虫,今次就係壓軸嘅日本漫畫驚慄大師楳圖一雄,
有時我都覺得好神奇,試過兩三次我同時買漢民舊書、手塚漫畫同楳圖漫畫,每次都係先將楳圖嘅一本看完才看其他,我諗原因係佢嘅故事內容吸引度比到我一定嘅信心所致,所以佢嘅書,凡係出過中文版的,我都己經一本不漏地睇晒!
而睇過嘅朋友都知,佢唔係以畫功而係以故事、劇情、驚慄、奇玄去吸引無數讀者,大家都知,這類題材要寫長篇而能維持吸引度及銷量難度好高,漢民唔得、黃玉郎唔得、手塚治虫唔得、伊藤潤二向着長篇為目標,但楳圖一雄就有好多套長篇而又受歡迎嘅著作,
楳圖一雄1956開始出第一部作品,1996年封筆,嘅書喺香港,幾乎全部由"玉皇朝"出版,多年來都差不多出晒佢嘅經典,但還是有大量短篇未有出中文版,而我今期就一次過差不多show齊晒我所有嘅楳圖一雄書出黎,可謂香港、台灣出過嘅中文版己經喺晒度,香港台灣冇出過嘅日文版都有幾本。



赤少女,短篇集,未有出過中文版

2012年8月23日 星期四

手塚治虫大全集part 2

手塚治虫嘅怪異神鬼著作,絕對唔少,我睇過港日無故怪異鬼漫作品,欣賞過眾多漫畫家手筆,手塚治虫嘅神鬼怪異漫畫故事,可以算係我最頂級至愛之一!
佢嘅故事演譯同表達手法嘅功力,同行之中,好難揾到對手,全部故事又多為自度自寫自畫,是更令人認為值得尊敬之處!
趁着今期"鬼故之月"就盤點一下手塚嘅一些神鬼怪異作品。



怪異作品大合照

2012年8月20日 星期一

伊藤潤二作品part 1

近代日本鬼故大師,非伊藤潤二莫屬,佢嘅作品,好多都己被拍成電影、或者電視劇,
佢筆下作品,充滿咗奇幻思想、天馬行空、畫面感豐富、擁有無限量嘅創作空間同想像力,
當然,畫鬼故要長久耐看受歡迎,公仔要畫得靚是比較佔優,伊藤嘅鬼故就有晒以上嘅元素,
一些喜愛看鬼故嘅朋友、追求畫面刺激嘅朋友,若要硬性只選一位近代日本鬼漫作者嘅作品去閱讀,伊藤潤二係唯一同最好嘅選擇,亦是在下嘅心水推荐!
佢嘅作品至今出得唔算太多,所以即使要現在起步收藏佢嘅作品都唔係太困難,以下就是他多年來嘅一部份著作,你又睇過或聽過幾多呢?



2012年8月17日 星期五

上官小龍。猫妖、魔犬

上官小龍係上官小威、上官小寶嘅大佬,若果上官小龍冇入行,都好難講有冇小威同小寶,不過我們這一代,對於上官小龍嘅印像比較糢糊,上官小威、上官小寶就知道嘅較多,而上官小龍我都係睇返佢啲鬼書先至比較認識佢!
猫妖、魔犬二書都係1979年同時期嘅鬼書,故事情節好簡單直接,就係妖怪、惡鬼、殺人、死亡等元素,睇返這種年代嘅鬼書或者打書,根本無須要要求計較什麽精彩內容、緊張劇情、縣疑佈局、曲折編排,或者是出色畫功,我哋只係睇返一種懷舊嘅味道、舊時嘅情懷,己經是這些書嘅價值所在!我哋一切來懷舊,上官小龍作品,猫妖、魔犬.......



2012年8月14日 星期二

謝志榮、鄧志輝、周勝。精裝猛鬼

精裝猛鬼係一套1990年由龍乘風出版嘅綜合鬼故漫畫,主筆有其後畫海虎、武神嘅鄧志輝,仲有謝志榮、周勝、梁偉傑、余健培、李志全、郭允豪等等....
唔知有冇朋友知道這套書總共出咗幾多期呢?而我自己就有1-16期,相信即使未齊,都差不遠矣!原因這套書同出版社當年都只係算二三綫,銷量同發行量少,又偏於冷門,所以集齊嘅朋友一定唔會太多,不過我可以講這套書內謝志榮嘅幾篇鬼故都非常不俗。
因為套書內容太多,我只揀選謝志榮、鄧志輝、周勝三位嘅版頭刋登,另外特別介紹係郭允豪嘅兩篇故事,此君畫功了得,但來歷同去向不詳.......

謝志榮、鄧志輝、周勝"精裝猛鬼"作品一覽:

謝志榮:
賭鬼上集-----------------第01期
賭鬼下集-----------------第02期
秦俑-----------------------第10期
吊頭繩--------------------第11期
大將軍--------------------第12期
殺人樹--------------------第12期
妖魔道--------------------第13期
救命呀!-------------------第13期
猛鬼選美會--------------第14期
魔鬼玩偶-----------------第14期
南洋降頭-----------------第15期
鬼鞋-----------------------第15期
狂魔劫--------------------第16期

鄧志輝:
塘西篇--------------------第01期
花街紅淚-----------------第02期
一夜風流-----------------第03期
寶馬山寃魂--------------第04期
烹夫案--------------------第05期
再見雨夜殺手-----------第06期
慈雲山凶屋--------------第07期
拜關帝--------------------第08期
兒孫滿靈堂--------------第09期





2012年8月11日 星期六

北京陳。夏天的鬼故事

炎炎夏日,消暑嘅最佳讀物,就係睇下鬼故,這本由蔡 瀾原作主編,北京陳所畫嘅"夏天的鬼故事"就符合晒主題!
這本雖非什麽名作或由名氣主筆担當,相反僅是一本普通而又平價嘅鬼書,不過這本書題材幾另類,有別於市面其他鬼書,故事表達手法亦有所不同;
本書有20個故事,以一個主角去串連,雖然每個故事都有"鬼"出現,但每個都係好靚嘅女鬼,每個都係輕鬆、搞笑、報恩式嘅故事,全書完全沒有恐怖驚赫感覺,所以即使害怕睇鬼故嘅朋友亦會啱睇!



2012年8月8日 星期三

謝志榮、李高。降頭

馬榮成、馮志明、謝志榮喺好耐之前就被稱為三師兄弟,亦代表三人畫功各自有返咁上下,雖然謝志榮在畫壇成績遠不及前兩者,但最初時其實三人差不太多,而現在睇返謝志榮以前啲作品,都係好有親切感同充滿懷舊feel!
謝志榮在初出道時其實畫咗好多鬼書,同時期嘅作品一定唔會少過馬榮成或馮志明,這本"降頭"就係其中嘅一本。
"降頭"一書內共有四段故事;書名分別為降頭、魔童、魔島、夢遊人,前三個故事俱為謝志榮所畫,而"夢遊人"則須睇下有冇朋友知道出自何人手筆啦!
"降頭"故事乃講男主角被舊女友落咗降,成日將身邊朋友看成了鬼怪。"魔童"則講個女仔買咗一顆不祥寶石,令她回到古代,擁有超能力嘅魔童將她救回。"魔島"則講男女主角海上泛舟,被怪風吹至無人荒島,原來島上全是彊屍,經歷重重,最後兩人還是難逃一死!




2012年8月5日 星期日

龐重輝。金裝奇談、妖魔鬼怪

相神讓龐重輝一舉成名,又係龍虎門主編,但佢初初都係畫開唔少鬼故,今次介紹嘅兩本:金裝奇談、妖魔鬼怪都係屬於甚少見到嘅龐重輝早期鬼書。
妖魔鬼怪一書收錄咗佢四段早期鬼故事,分別以妖、魔、鬼、怪做故事橋段。其中我比較喜歡"生日快樂"這個故事,小女孩向撒担要求每日都是生日,咁每日都有人為佢舉行生日party,結果願望成真,小女孩每日都是生日,每日都有生日party,唱"生日快樂",結果就係三個月後小女孩己變成老太婆,因為佢己經90多歲了.......
另一本"金裝奇談"其中一個故事"大佬出馬",龐重輝將龍虎三皇畫埋入故事內,王小虎、石黑龍、王小龍,做咗故事中江湖大佬條靚,依家睇返當時呢啲書,認真搞鬼原來喺龐重輝未成為龍虎門主編之前,佢這套短篇鬼書之內己有畫過三皇,唔知佢當時預唔預料到後來黃玉郎真係將"龍虎門"交給他呢?又還是黃生睇過佢這篇短稿就決定將"龍虎門"交比佢呢.....




2012年8月2日 星期四

戇男。戇男鬼故

戇男啲畫同公仔一向好有特式同個人風格,所以佢係我另一位非常之鍾意嘅主筆!
可以講從來只有好少數主筆漫畫人可以不停用自己個筆名出咁多本書,但係戇男就可以,戇男故事、戇男鬼故事、戇男漫畫、戇男戀曲,加埋己經差不多有成270本以"戇男"為書名嘅單行本,仲有無、諗唔諗到其他漫畫人係可以咁樣?!
而這本"戇男鬼故"約喺90年代初出版,但係收錄咗戇男80年代最早期嘅一些短篇散稿約5、6篇。