Google+ Followers

2012年5月31日 星期四

黄偉健。玄門戰士、玄門神鑑

健君黄偉健以畫玄學風水漫畫最為人所熟識,之前post過佢一套"靈幻小姐",今次介紹佢"神鑑"系列之中嘅兩套作品:玄門戰士、玄門神鑑,
"玄門戰士"係黄偉健1992年作品,一期完自由人出品,"玄門神鑑"係"俠骨神鑑"嘅延續篇,亦係"神鑑"系列之中嘅第2部,94年出版,全套十本,
雖然這類講風水玄學漫畫一向唔係港漫主流,更加係屬少有嘅漫畫題材類別,不過睇咗呢類漫畫,唔多唔少會對風水玄學一門,增加到些少認識,是其他書種比唔到嘅。



2012年5月27日 星期日

不文夫子。黃國興

搞笑能手黄興豬一直以來都keep住出過唔少作品,不過以短篇居多,啲作品又極為分散,因為佢啲作品多數只係以短篇形式連載於其他作品之內,故不論是前期或是後期,佢嘅個人單行本相比其他主筆都唔算得太多!
這兩本齊套嘅"不文夫子"雖只係2004年作品,但係都甚少見架!內容就如其名"不文"咸咸地有味嘅搞笑漫畫,畫返最擅長嘅搞笑路線,係黃興豬fans呢套就千祈咪錯過啦



2012年5月24日 星期四

司徒劍僑。萍踪俠影錄

司徒劍僑最早幾套個人單行本,都係由"斯辰文化"出版,這個出版社啲書少而難見,不過這套"萍踪俠影錄"唔算係司徒劍僑最早嘅單行本作品,因為同期尚有1套6本嘅"幻影迷離",更加唔算係司徒劍僑嘅最早武俠作品,因為"戰神"比"萍踪俠影錄"還要早些,
不過"萍踪俠影錄"、"幻影迷離"、"戰神"三套書基本上就係司徒劍僑嘅最早單行本作品。
"萍踪俠影錄"係與亞視合作,同時與電視劇"萍踪俠影錄"一起推出嘅漫畫書,亦係開咗電視劇、漫畫同步推出嘅先河!
這套書我只有創刋,見過第二期封面改回由司徒劍僑畫,但就唔記得這套共有兩本還是3本了,有冇人知道呀?

松哥、米雪嘅萍踪俠影錄,好吸引嘅經典組合,冇印像睇過,真係想有機會睇返!



2012年5月20日 星期日

上官小强。元祖壽星仔(小龍牌)

這是一套比"玉郎牌"正宗"壽星仔"更早出版嘅元祖小龍牌"壽星仔",睇下我個嘜頭頭像都取自這套書封面,就知係好嘢啦
這套小龍牌"壽星仔"約於1975年出版,近40年歷史,套書有幾犀利?因為連當年還未入行嘅馬榮成、馮志明、黃國興等統統係這套書嘅fans,當年佢哋都還未入行,仲以讀者嘅身份多次投稿這套書內嘅"讀者園地",佢哋嘅投稿同評分,都刋載於這套書內,可以講係佢哋嘅最早登場作品無疑!

有否發現旦凡改"上官"姓氏的都會成為畫壇成功人物?上官小龍、上官小寶、上官玉郎、上官小威.....
而其中上官小强真係好犀利,從2毫子細書開始己經見到佢老人家大量作品,後又有一套壽星仔從橫版書時代開始一路畫到直版,共畫至541期才完結,可以與龍虎門李小龍兩套書同時代而又這麼長壽的,就只有"壽星仔"!
"壽星仔"分別有小龍牌同玉郎牌;這套小龍牌更加係元祖"壽星仔",應該共有20多期,係喺玉郎牌541期嘅正宗"壽星仔"之前出版,所以公仔上還是比較幼嫩,但正正是如此才更加有味道!
小龍牌"壽星仔"可以由直度書過渡到橫版書,己經係港漫之中絕無僅有嘅例子,加埋期後玉郎牌"正宗"壽星仔"又由橫度書時代過渡到直度書,可以經歷到咁樣嘅香港連環圖轉變過程者,除壽星仔之外,又係只得小流氓龍虎門同李小龍可以做到!
這套小龍牌"壽星仔"其實肯定比"玉郎牌"正宗"壽星仔"更有歷史同價值,不過玉郎牌"壽星仔"因為讀者更加廣泛、名氣更加大,早期嘅玉郎牌橫版"壽星仔"亦非常罕有了!


元祖小龍牌"壽星仔"直度書連橫版書共20多期,約於1975年出版,我這裏去到第25期,唔知有冇大哥知道這套嘅確實期數呢?


2012年5月16日 星期三

第100篇:程BLOG之誕生,回顧總結之前、展望將來!

不經不覺,己經寫到第100篇,本來今回原定係POST啲私伙收藏書出黎,但回想100篇,對於寫網誌來說,只不過係微不足道嘅一個個人BLOG,大把BLOG早己超過一千回,但係單純只以全懷舊漫畫書為主嘅BLOG,又並不多!喺一百篇之前,真係未曾有同大家長篇大論吹過水,所以趁這第100篇不如來個總結、回顧加展望!
回想喺一百篇之前,為何會開始第一篇?這其實與在下一向"人棄我取"嘅儲漫畫習慣一樣.....
原因在前幾年寫漫畫BLOG較興盛嘅時期,在下並無任何參與過,因為有好多收藏漫畫書嘅BLOG友各自開BLOG,拎晒啲陳年珍藏家檔出黎分享,一時情況好不熱閙,在下都樂見大家嘅私伙珍藏此起彼落地新鮮上BLOG!
不過玩咗兩三年眼見好多BLOG友啲"珍藏"品都SHOW晒,加上FACEBOOK大行其道,漫畫BLOG己經日漸減少中......有一次同位朋友傾開,佢話:而家啲漫畫BLOG好似漫畫市道咁,越開越少越淡靜,你既有咁多書,點解唔整理下開返個BLOG去填補一下己日漸流失嘅漫畫BLOG?
基於這番話,同埋我"人棄我取"嘅習慣,我選擇咗開BLOG而唔用流行嘅FACEBOOK!"程BLOG"就誕生咗!
開咗BLOG之後先發覺其實寫BLOG某程度上好似儲漫畫嘅精神一樣,必要有恆心、忍耐力同堅持,先至會有少少成績!
而就開BLOG前觀察所得,過去到現在,超過9成以上嘅"漫畫BLOG"都唔係百份百純寫漫畫為主,而係會夾雜埋其他相關題材,又或者將漫畫成為BLOG內其中一個欄目,這又難怪大部份BLOG主會這麼做,因為若單單靠寫漫畫為主,而不加入其他漫畫以外嘅題材,就好難維持到長期有足够嘅"書"去供應,故此絕大部份有寫漫畫嘅BLOG主都須要兼顧寫埋其他漫畫以外嘅項目或題材,這樣好處是個BLOG會多元化,個BLOG又能够長期維持經營下去。
回說"程BLOG",在下雖然都還有好多其他嘅嗜好同收藏,開BLOG前也曾考慮是否可以加入其他漫畫書以外嘅主題?但想到"程BLOG"既然最初嘅目的係為"漫畫書"而開,就希望直到本BLOG最後一篇,都係會以純漫畫書為主題!
"程BLOG"將繼續咁着重於以"漫畫書"為基本嘅宗旨,至於其他屬於"漫畫書"以外由漫畫衍生出黎嘅副產品及漫畫周邊,例如漫畫專欄、刀劍兵器、漫畫咭、特別版、手辦模型....等等,就唔會有太多介紹,至多會間中介紹下海報啫。而這些副產品、漫畫周邊、漫畫專欄等就交給其他BLOG友介紹好了!
另外,本BLOG雖然係以介紹舊書為主,但並唔代表會守舊、一成不變,更會不斷開闢一些之前從未有BLOG主探討嘅主題同項目,例如之前加入反應相當唔錯嘅"朋友嘅珍藏分享"就係幾特別嘅構思,而最新加入嘅"六大港漫"系列同"五大鬼書"系列,就係包含咗港漫之中最精彩最珍貴嘅部份!也是所有港漫讀者都會涉及嘅範圍!
在此略略介紹一下本BLOG在接下100篇所加入嘅新欄目;"六大港漫"系列、"五大鬼書"系列,先講"六大港漫"系列,故名思義就係排在香港最前列嘅6套港漫,係在下以各套漫畫嘅歷史、知名度、受歡迎程度、珍藏價值度、齊套嘅艱難度、作者實力與知名度、銷量、期數等等而區分評定出"六大港漫",我依照齊套嘅艱難度排序,分別為李小龍、小流氓+龍虎門、醉拳、如來神掌、中華英雄、刀劍笑,
"五大鬼書"系列,分別為怪異集(570本)、猛鬼冤魂(228本)、怪談(165本)、靈周刋(121本)、72行鬼禁忌(72本),"六大港漫"同"五大鬼書"相信這兩個系列就係港漫之中最難集齊嘅三個頂級系列嘅其中兩個!當中即使係我所有識得嘅收藏漫畫朋友,都還未有人集得到這兩個系列共11套書之中任何2套者!我可以講若有任何朋友可以集齊這兩個系列當中嘅任何4套書,己經可以列入"傻佬"嘅級別!而"六大港漫"、"五大鬼書"就係介紹這11套最具難度和挑戰性嘅書!
就講住咁多先,下次再"吹水"嘅時間可能要係第200篇啦

第100回同場加映:刼後重生、圖書歸位

以下大家睇到嘅係本人數年前力戰蛀書大蟲(白蟻),劫後重生,圖書歸位前嘅片段,當時最傷係被大蟲註掉整套前800期李小龍及其他唔少正書,令我要花足近5年時間才只能搜集返6成嘅失書

大戰遇後,將刼後餘生嘅書全部重新入袋....




2012年5月13日 星期日

BLOG友ERIC兄嘅收藏分享

今次再度登上Eric兄嘅部份私伙收藏,因為Eric附圖及收藏品太多,不能盡錄,只好挑選部份貼出,有啲書大家都冇可能全部擁有得晒,有時欣賞下別人嘅收藏品,都係一件樂事

居然有咁多利志達啲舊書



2012年5月4日 星期五

美樹本晴彥。超時空要塞特刋畫集+超時空世紀+漫畫周刋海報

超時空要塞這麼經典卡通,相信都無乜朋友未睇過,入面啲經典角色,未沙、明美、一条輝都無乜人唔識得!
這套片集當時真係一出熱爆!而衍生出嘅副產品多如繁星,超時空要塞、超時空世紀嘅人物設定係美樹本晴彥,今次介紹佢這本於1983年出版嘅"超時空要塞"特刋+畫冊係非常有收藏价值,因裏面收錄咗佢唔少幅"超時空要塞"早期畫稿同人物設定!而今次除咗這本特刋+畫冊之外,同時貼埋佢套"超時空要塞"7(全套8本)及"超時空世紀"(全套5期),仲有加埋當年係"漫畫周刋"內送出嘅超大size超時空系列海報!這些都是我們的集體回憶,讓我們一齊回顧......

超時空要塞特刋畫集,1983年版