Google+ Followers

2012年1月31日 星期二

天下女主筆:雪晴作品part 1

雪晴係香港目前最活躍多產嘅女主筆,佢啲作品最初喺yes雜誌內連載,後來開始出單行本,出咗幾多本作品,就真無統計,不過肯定係唔少!
我哋睇開港漫嘅男讀者,好少去買啲女主筆嘅書睇,不過就我觀察所得,可以講佢嘅作品每次出完無幾耐就斷晒市,算係幾好賣,你買一本舊龍虎門、天下,可能仲容易揾過一本雪睛作品!証明佢啲書,係有唔少女讀者keep住架!
佢後來又成為天下嘅獨立女主筆之一,不過係完全無馬仔風格兼完全無受佢影响嘅獨立主筆!
至於佢啲畫功同公仔;只能够講:佢啲公仔畫得靚過唔少其他新舊主筆架!而對我黎講,主筆畫得有誠意、公仔清新幾靚就OK,大家睇打書江湖書多,剩餘嘅少少不仿支持下本地嘅女主筆作品!

以下介紹她其中一部份作品:

盲點湖(2003年出版)




2012年1月28日 星期六

情人節之月:劉雲傑。段段情濃

在接下的十多篇,都會配合情人節之月,介紹好多新、舊、冷、熱嘅港漫日漫"情書",這十多篇出場嘅主筆預計將有黃建偉、漢民、嚴志超、林海峯、劉雲傑、梁瑋豪、陳順康、司徒劍僑、李高、林祥焜、何志文、永仁、馮志明、狄克、雪晴、北京陳、葉明發、鍾國光、謝志榮...佢哋畫打書、鬼書大家見得多,但這些主筆曾幾何時都畫過唔少愛情故事,讓我們知道港漫曾經除了打書鬼書江湖書之外,還有好多"情書"可以選擇,
這批書,雖然唔係太耐歷史前,但係都屬於"熱門主筆嘅冷門作品",所以相信即使有、又或者好似我咁齊全嘅人唔會太多.....
"情書"也曾經是唔少主筆嘅另一條出路,可惜係香港嘅讀者大多數太過"偏食"、太過"慣性收視"打書,而扼殺、局限咗其他書種嘅發展,這種長期不良、不均衡發展,也就是港漫死因之一!而喺"情人節"嘅這些內容之中,就會睇到好多熟識嘅主筆都可以畫到愛情故事,只係須要大家俾多啲機會佢哋,睇黃玉郎馬榮成邱福龍之餘,也睇多啲其他主筆嘅書,睇打書之外,也睇返多少少其他題材!咁樣港漫就唔駛"吊鹽水"!

言歸正轉;港漫之中,愛情、言情漫畫曾與武打漫畫、鬼書鼎足而立,狄克、志文、崔成安、祖兒、劉雲傑、雪睛等等都係此類題材高手!
而其中劉雲傑可以喺日本國際漫畫大賽得金獎、一套"百份百感覺可以出到咁多個版本、兼可以拍成大收嘅電視劇同電影,真係無乜香港漫畫家可以做得到!劉雲傑,就係近代香港漫畫界最出色嘅一個天才嘅漫畫家!
喺佢畫"百份百"之前,呢套"段段情濃"單行本,真係正到爆晒燈!好開心香港仲可以出到咁勁嘅劉雲傑!仲可以見到劉雲傑堅持出非打書類漫畫!佢未能好似馬仔、邱褔龍咁成功,絕對同畫功、能力無關,只係佢寫畫速度不及、出品太少而己!
可以講無呢套"段段情濃"嘅成功,就根本唔會有百份百感覺嘅出現!"段段情濃"出版過好幾個版本,包括原裝版、精裝版、修訂本等,能够出過咁多版本嘅書,唔係咁多,亦都証明係好嘢。
P.S.劉雲傑,段段情濃亦係我推荐必看必收藏嘅20套港漫之一



2012年1月22日 星期日

賀年漫畫、海報篇

以下這些曾經出過嘅賀年漫畫、海報,各位可有印像?可有記憶?祝大家、各BLOG友朋友及本帖瀏覽者新年快樂、心想事成



2012年1月20日 星期五

野部利雄。傳說

睇開日漫嘅朋友,或都會知道不久前有一套"擊情的天空"是講打拳的漫畫,該套書作者野部利雄正是這套"傳說"嘅同一個作者。
這套書又係沒有出過正式中文版,只有老翻"威馬叢書"嘅薄裝版,而"威馬叢書"同海豹叢書都係同一類型,內容正式係少少咸多多趣,是一套非常難齊嘅舊日漫書....
"黑暗族"要統治世界,被神選定擁有超力能嘅少女"蜜兒"領導部族人民與"黑暗族"邪魔、妖獸對抗,建立了"拉。蜜兒帝國,最終消滅了邪神,創造了愛與慈悲的世界!



2012年1月18日 星期三

新嘅一年,祝願世界和平,千葉徹彌。戰鬥飛行員

香港有關戰爭、抗戰時期嘅漫畫題材並唔多,或者大家都知道嘅有慘痛的戰爭、財叔,但係日本就有唔少講述戰爭時期嘅漫畫。
我就推介這套係1963年千葉徹彌嘅"戰鬥飛行員"嘞,這套書係講述主角係一個技術高超兼有天份嘅飛行戰鬥部隊機師,作者描寫表達出戰爭時期嘅無奈;與家人長久分離不能見面、愛人、無數嘅朋友、戰友、以至在交戰中惺惺相識嘅敵方一一戰死!
作者描述主角係天才戰鬥飛行員,經常運用新創獨特嘅飛行秘技和技術去重創敵方軍隊,又或身陷險境以寡敵眾,亦有大量互相鼓勵振作同埋輕鬆搞笑場面,統統都係表現出當時期大和嘅不死精神!
本書初段似乎是頌讚日本戰鬥隊嘅戰鬥飛行員英勇、優秀、往往可以以一敵十、百戰百勝,但後段己見局勢開始逆轉,主角嘅戰友亦相繼戰死,伏下咗日本最終敗亡嘅史實!
末段:係描寫主角天才戰鬥飛行員瀧城太郎人生最後一段歷程.........
瀧城太郎從一個充滿天份、技術超卓百戰百勝、不知天高地厚嘅少年天才戰鬥飛行員,在戰鬥過程中目睹戰友、良師一一戰死離開,開始反思戰爭和人生,開始思考發動戰爭究竟是對或錯?亦都開始厭戰,最後甚至違抗上司命令而被嚴刑烤打及送上軍事法庭,雖然最終得到釋放,但在本書的最後,就係主角瀧城太郎無奈地被强編入"神風戰鬥隊".....

因為這套書未必有咁多人睇過,所以用多咗少少篇幅寫,千葉徹彌最終都係想帶出戰爭禍害嘅信息。


全套6本

2012年1月15日 星期日

崔成安。衛斯理傳奇之紙猴

1984年出版嘅崔成安"衛斯理傳奇紙猴",非常可惜的是,崔大師當年實在要兼顧太多其他工作,崔大師嘅衛斯理故事系列,只係得呢一干零一套,並未能像利志達一樣出咁多衛斯理一兩期完嘅故事,誠言就係讀者嘅損失!
這套紙猴原薄裝彩色版只出到第2集,並未出齊到完結,其後再出黑白版為合訂本,有成4本薄裝嘅厚度,就係整套完整嘅故事,而兩個版本除了白黑同彩色分別之外,彩色單行本有幾張彩頁內文,係合訂本沒有的,所以要儲晒三本才算完整!


2012年1月12日 星期四

馮志明。少林奇兵

少林奇兵係馮志明1984年嘅作品,全套30本,雖然是寫着黃玉郎、馮志明聯合編繪,但係全書究竟黃生參與過幾多,真係唔清楚,不過肯定嘅係"少林奇兵"書名是由黃生改的。
這套書在那時可以出到30期,雙周刋歷時近兩年才完結,己屬難得,也是老馮第一套"長篇"作品,係講少林少年武僧圓通尋找取回被盜走嘅彿祖舍利子故事,這套書相信唔少朋友都好熟悉,就唔講太多啦!



2012年1月9日 星期一

冷門鬼書大雜燴(香港漫畫雜part 8)

80年代初至90年代,出過好多鬼書,但係留存下來的,相信是少之又少,一些較多期數嘅全套鬼書漫畫,真係難度極高的收藏系列!
但原來除咗當年流行嘅熱門書之外,尚有無數一兩期至十多期嘅鬼書出版,這些書何時出版、什麼人畫?有多少期數?怎麼無聲無息地消失?可能從來無人問津、無人留意,亦相信根本無任何一個資深漫畫收藏家可以答得到!
今次搜集拼凑咗部份好冷門嘅鬼書系列(當中唔少係來自朋友嘅捐贈)擺上BLOG作為一個存檔,你又認識、曾經有印像見過其中嘅幾本嗎?

龐重輝。妖魔鬼怪



2012年1月6日 星期五

冷門二毫子書仔part 2

這次又再介紹下我啲二毫仔書仔,呢啲書仔有成幾十年歷史,恐怕己經無乜人再見過同記得咯!加上好多又唔係啲出名漫畫家,就更加無人會留意了,呢啲一期完嘅書仔,即使在當年都己經算係冷門,更何况經歷咗幾十年仍然保留得下來的?所謂"超冷門"就係咁樣形成!而每一本留下來的,不論目前價值貴賤,其實都係值得保存珍惜同尊重。

李光榮。核子人